पणजी: शहराच्या मध्यवर्ती ठिकाणी असलेली ‘जुन्ता हाऊस’ ही इमारत तातडीने रिकामी करण्याचे आदेश जिल्हाधिकाऱ्यांनी दिले आहेत. ही इमारत धोकादायक स्थितीत असून, संरचनात्मकदृष्ट्या ती अत्यंत कमजोर बनली आहे, असे अहवालात नमूद करण्यात आले आहे. त्यामुळे पुढील ३० दिवसांत ही इमारत रिकामी करण्याचे निर्देश संबंधित शासकीय विभागांना देण्यात आले आहेत.

‘जुन्ता हाऊस’ ही अनेक शासकीय कार्यालयांची व निवासस्थानांची जागा आहे. काही कार्यालये अद्यापही तेथे कार्यरत आहेत. मात्र, इमारतीच्या जुनाट अवस्थेमुळे भविष्यात दुर्घटनेचा धोका लक्षात घेता सरकारने हा निर्णय घेतला आहे.

ही इमारत नॅशनल बिल्डिंग कन्स्ट्रक्शन कॉर्पोरेशन (एनबीसीसी) इंडिया लिमिटेडमार्फत पुनर्विकासासाठी निश्चित करण्यात आलेल्या शासकीय इमारतींपैकी एक आहे. पुनर्विकास प्रकल्पांतर्गत ‘जुन्ता हाऊस’सह पणजीतील इतर काही शासकीय इमारतींचे नूतनीकरण किंवा पुनर्बांधणी करण्यात येणार आहे.

या पार्श्वभूमीवर, सुरक्षितता आणि नियोजन लक्षात घेऊन ही कार्यवाई तातडीने करण्याचे निर्देश देण्यात आले आहेत. या आदेशामुळे इमारतीत सध्या कार्यरत असलेल्या अधिकारी, कर्मचाऱ्यांना स्थलांतराची प्रक्रिया पूर्ण करावी लागणार आहे. नवीन जागांची व्यवस्था तत्काळ केली जाईल, असे प्रशासनाकडून सांगण्यात आले आहे.