पणजी : गोव्यातील नामांकित धेंपो उद्योग समुहावर सक्तवसुली संचालनालय अर्थातच ईडीने छापा टाकला आहे. पणजीतील धेंपो हाऊस आणि इतर आस्थापनांवर छापेमारी केल्याची माहिती आहे. सोमवारी सकाळपासून गोव्यात अनेक ठिकाणी ईडीने छापेमारी सुरु केली आहे.

(ED Raids Dempo Group in Goa)

ईडीच्या धेंपो समुहावरील छानेमारीनंतर आता पणजीसह गोव्यात चर्चा सुरु झाल्या आहेत. नुकत्याच झालेल्या गोवा विधानसभा निवडणुकीत धेंपो समुहाचे सर्वेसर्वा श्रीनिवास धेंपो यांनी दिवंगत मुख्यमंत्री मनोहर पर्रीकरांचे पुत्र आणि पणजी मतदारसंघाचे अपक्ष उमेदवार उत्पल पर्रीकर यांना पाठिंबा जाहीर केला होता. त्यामुळेच त्यांच्यामागे ईडीची यंत्रणा लावल्याची कुजबुज पणजीत सुरु झाली आहे.

दुसरीकडे गेल्या अनेक वर्षांपासून गोव्यात अशा प्रकारची छापेमारी झाली नव्हती. त्यातच खाण व्यवसाय ठप्प असल्याने धेंपो समुहावरच धाड का टाकण्यात आली अशीही चर्चा सुरु आहे. धेंपोंनंतर अन्य व्यावसायिकांवरही ईडी धाड टाकणार का अशी धास्ती व्यावसायिकांना वाटू लागली आहे. काही काळापूर्वी अशीच शेख मुख्तार समुहावरही धाड टाकण्यात आली होती, ज्यात मोठ्या प्रमाणात सोनं आणि रोकड जप्त करण्यात आली होती.