E-Beat App: आजकालच्या डिजिटल जगात तंत्रज्ञान वेगाने प्रगत होत आहे. विविध गरजा लक्षात घेऊन नानाप्रकारचे शोधही झपाट्याने होत आहेत. मोबाईल आणि इंटरनेट क्रांती झाल्यापासून एप्लिकेशनच्या माध्यमातून अनेक सुविधा आणि सेवा सहज मिळवणे शक्य झाले आहे. सरकारच्या आणि प्रशासन पातळीवर देखील डिजिटल सेवांचा वापर होत आहे.

गोव्यातील अभियांत्रिकी विद्यार्थ्यांनी एक भन्नाट शोध लावलाय, ज्याचा पोलिसांना मोठा फायदा होणार आहे.

गोवा अभियांत्रिकी महाविद्यालय, फर्मागुडी आणि इन्फोटेक कॉर्पोरेशन, अल्तिनो यांनी संयुक्तपणे 'ई-बीट बुक' नावाचे मोबाईल एप्लिकेशन डेव्हलप केले आहे.

नुकतेच विद्यार्थ्यांनी या एप्लिकेशनचा मुख्यमंत्री यांच्यासमोर डेमो सादर केला. सावंत यांनी या शोधाबाबत विद्यार्थ्यांचे कौतुक केले आहे.

विद्यार्थ्यांनी तयार केलेल्या 'ई-बीट बुक' मोबाईल एप्लिकेशनची पोलिसांना मोठी मदत होणार आहे. पोलीस एका क्लिकवर प्रत्येक बीटची माहिती मिळवू शकणार आहेत.

या एप्लिकेशनमुळे गोवा पोलिसांना मोलाची मदत होईल, असा विश्वास मुख्यमंत्री सावंत यांनी व्यक्त केला आहे. तसेच, गोव्यातील विद्यार्थ्यांनी कौतुकास्पद तंत्रज्ञान विकसित केल्याचे सावंत यांनी म्हटले असून, विद्यार्थ्यांना कौतुकाची थाप दिली आहे.