फोंडा : खांडोळा - आमोणे पुलाजवळ शनिवारी रात्री झालेल्या जीवघेण्या अपघातप्रकरणी फोंडा पोलिसांनी ओमलिंग प्रभूलिंग मंतगी (वय 35) याला अटक करून त्याच्यावर गुन्हा दाखल केला आहे. ओमलिंग हा मूळचा गुलबर्गा - कर्नाटक येथील असून सध्या तो साखळी येथे राहतो. टेंपो आणि मोटारसायकल यांच्यात हा अपघात झाला होता. त्यात दुचाकीस्वार मदन डिसोझा हा ठार झाला होता.

दुचाकीवरील अन्य एक स्वार विकास विठ्ठलप्पा रनहळगी ( वय 20) हा बेळगाव येथील युवक गंभीर जखमी झाल्याने त्याला बांबोळी येथील गोवा वैद्यकीय महाविद्यालय इस्पितळात उपचारासाठी दाखल करण्यात आले आहे. निष्काळजीपणे टेंपो चालवल्याने हा अपघात झाल्याने टेंपोचालक ओमलिंग मंतगी याच्यावर सदोष मनुष्यवधाचा गुन्हा दाखल करण्यात आला आहे. फोंडा पोलिस याप्रकरणी अधिक तपास करीत आहे.