फोंडा: लोकविश्वास प्रतिष्ठान, ढवळी, फोंडा - गोवा येथे जागतिक डाऊन सिंड्रोम दिवसाचे सोमवार दि. 21 रोजी औचित्य साधून गोव्यातील विशेष शाळेतील 12 वर्षाखालील डाऊन सिंड्रोम विद्यार्थी व त्यांच्या पालकांसाठी राज्यस्तरीय वेशभूषा स्पर्धा घेण्यात आली. या स्पर्धेमध्ये गोव्यातील दहा विशेष शाळांनी सहभाग घेतला. या कार्यक्रमासाठी प्रमुख पाहुणे म्हणून सांतान फर्नांडिस, उप-संचालक, समाज कल्याण खाते, गोवा राज्य, हे उपस्थित होते. तसेच विशेष अतिथी म्हणून तीन वेळा राष्ट्रीय दिव्यांग कुशल कर्मचारी पुरस्कार विजेता, इंडियन स्पीकर, इंटरनॅशनल सेलिब्रेटी, ग्रंथपाल सहाय्यक, डी.के.टी. इंजिनिअरिंग कॉलेज, इचलकरंजी, कोल्हापूर येथील प्रथमेश दाते उपस्थित होते.

लोकविश्वास प्रतिष्ठान संस्थेचे अध्यक्ष, अनुप प्रियोळकर यांनी कार्यक्रमाचे प्रास्ताविक केले तसेच सचिव सौ. सविता देसाई यांनी प्रथमेशचे आई बाबा शारदा व यशवंत दाते यांची मुलाखत घेतली. ज्यामुळे विशेष मुलांच्या पालकांना प्रोत्साहन मिळावे म्हणून प्रयत्न करण्यात आला.यावेळी सविता देसाई लिखित "शोध आणि बोध दिव्यांगाचा" या पुस्तकाचे प्रकाशन करण्यात आले. वेशभूषा स्पर्धेचे परीक्षण अविनाश पारखे व मंदार जोग यांनी केले.स्पर्धेचे सूत्रसंचालन कुष्टा सोलयेकर तसेच कार्यक्रमाचे सूत्रसंचालन गौरी कामत यांनी केले. शाळेचे मुख्याध्यापक अरविंद मोरे यांनी आभार मानले.

वेशभूषा स्पर्धेत जुनेद व परविन काजी प्रथम

वेशभूषा स्पर्धेत लोकविश्वास प्रतिष्ठानची विशेष शाळा, ढवळी,फोंडा या शाळेतील कु. जूनेद काजी व त्याची आई परविन काजी यांना प्रथम पारितोषिक, केशव सेवा साधना विशेष शाळा, वाठादेव, डिचोली शाळेतील कुमारी. श्रेया गोवेकर व त्याची आई वसुंधरा गोवेकर यांना दुसरे पारितोषिक तसेच आनंद निकेतन विशेष शाळा, म्हापसा शाळेतील कुमार आर्यन गोवेकर व त्याची आई आराधना गोवेकर यांना तृतीय पारितोषिक मिळाले.