वास्को : काही राजकीय व्यक्ती गोव्यात राहणाऱ्या कानडी लोकांना गोव्याबाहेरील अशा प्रकारचे शब्द वापरून भेदभाव करून लोकांत द्वेष निर्माण करण्याचा प्रयत्न करत असून गोव्यात कन्नड भाषकच नव्हे, तर अनेक वर्षापासून देशातील विविध राज्याचे नागरिक वास्तव्य करून आहेत.

तसे सर्वजण कोणताही भेदभाव न करता एकोप्याने राहतात. मनोज परबसारख्या राजकारण्याने असे द्वेषाचे राजकारण करू नये. परब भारताचे संविधान न मानणाऱ्यातले आहे. असा भेदभाव केला तर भविष्यात दुसऱ्या राज्यात शिक्षण नोकरी व्यवसायासाठी असलेल्या गोवेकरांना त्रास होऊ शकतो असे वास्को चे आमदार कृष्णा साळकर यांनी रेवोल्युशनरी गोवन्सचे परब यांना ते सोशल मीडियावर घालत असलेल्या संदेशाला सडेतोड उत्तर दिले.

हेडलँड सडा येथे एका कार्यक्रमात वास्कोचे आमदार कृष्णा साळकर यांना याविषयी छेडले असता त्यांनी त्याचे उत्तर दिले. मनोज परब यांनी आमदार साळकर यांच्या विरोधात सोशल मीडियावर घातलेल्या संदेश बाबतीत पुढे बोलताना साळकर म्हणाले, एका पक्षाच्या नेत्याने इतकी खालची पातळी गाठून आपला दर्जा सिद्ध केला आहे. परबसारख्या नेत्याने गोव्याबाहेरील लोक असे वक्तव्य करणे बंद करावे. परब द्वेषाचे राजकारण खेळत आहे, हे त्यांनी दाखवून दिले आहे. गोव्यात कन्नडिगांबरोबर इतर राज्यातील लोक नोकरी, शिक्षण, व्यवसायासाठी अनेक वर्षापासून वास्तव्य करून आहेत.