साखळी: आदिवासी कल्याण संचालनालय, गोवा सरकार यांच्या वतीने यंदा गोवा राज्यात मोठ्या उत्साहात थोर स्वातंत्र्य सेनानी तसेच आदिवासी नेते भगवान बिरसा मुंडा यांची जयंती साजरी करण्यात येत आहे.

भगवान बिरसा मुंडा यांच्या जयंतीनिमित्त साखळी येथे आयोजित कार्यक्रमात मुख्यमंत्री डॉ. प्रमोद सावंत उपस्थितांना संबोधित केले, यावेळी त्यांनी भगवान बिरसा मुंडा यांच्या कार्याचा गौरव केला तसेच गोवामुक्तीनंतर आता पुन्हा धर्मांतरण खपवून घेणार नाही असे विधान केले.

"60 वर्षानंतरही काहीजणं लोकांना फसवून धर्मांतरण करण्याचा प्रयत्न करत आहेत. अशाप्रकारच्या व्यक्तींबद्दल लोकांनी जागरूक राहावे. या पद्धतीचे धर्मांतरण पुन्हा एकदा आम्ही खपवून घेणार नाही.

आदिवासी सामाज्यासासारख्या लोकांच्या आर्थिक व शैक्षणिक पातळीवरील दुर्बलतेचा फायदा उठवत देशात ब्रिटिशांनी तर गोव्यात पोर्तुगीजांनी धर्मांतरण केले होते. आता गोवा मुक्तीच्या 60 वर्षांनंतरही "आलेलुया" म्हणून अशाच दुर्बल घटकांना लक्ष्य बनवत धर्मांतरण करण्याचा प्रयत्न काही ठिकाणी सुरू आहे आणि यापासून लोकांनी सावध रहावे" असे आवाहन मुख्यमंत्री डॉ. प्रमोद सावंत यांनी केले.

भगवान बिरसा मुंडा यांच्या कार्याचा आढावा घेताना त्यांनी समाजाचे व आपण राहत असलेल्या परिसराचे जंगलाचे रक्षण करण्याच्या हेतूने बिसरा मुंडा यांनी केलेले काम प्रेरणादायी असल्याचे प्रतिपादन केले. ब्रिटिशांच्या काळात आदिवासी समाजातील लोकांना मशिनरी शाळेत प्रवेश देत शिक्षणांच्या बहाण्याने त्यांच्या आर्थिक बिकट परिस्थितीचा फायदा उठवत त्यांचे धर्मांतरण करण्याचे षडयंत्र ब्रिटिश सरकारतर्फे रचले जात होते.

बहुतेक वेळा आर्थिक व शैक्षणिक दृष्ट्या कमकुवत असलेल्या विशेषतः आदिवासी लोकांना या पध्दतीने धर्मपरिवर्तीत करण्यासाठी लक्ष्य बनविले जात होते. देशभरात हे षडयंत्र ब्रिटिशांनी सुरु केले तर गोव्यात हेच कारस्थान पोर्तुगीजांनी केले याची जाणीव सर्वांना आहे आणि आता अशा नवीन कारस्थानपासून गोमंतवासीयांनी सावध राहावे असे मुख्यमंत्री म्हणाले.