गाळेवजा दुकान जमीनदोस्त करण्याच्या कामात अतिक्रमण हटाव, दंडाधिकारी व पालिका अधिकाऱ्यांना त्यांचे कर्तव्य पार पाडण्यात अडथळा निर्माण केल्याप्रकरणी चौघांवर गुन्हा दाखल करण्यात आला आहे. याप्रकरणी म्हापसा पालिकेचे मुख्याधिकारी चंद्रकांत शेटकर यांनी म्हापसा पोलिस स्थानकात तक्रार दिली होती.

जुन्या आझिलो इस्पितळाच्या समोरील जीवन कोल्ड्रींक हे जीवन मयेकर यांचे कथित बेकायदेशीररित्या बांधलेले दुकान हटविण्याचा आदेश उत्तर गोवा प्रधान न्यायालयाने दिला होता. सोमवार, २८ रोजी या आदेशाची कार्यवाही पालिकेतर्फे अतिक्रमण हटाव पथक आणि दंडाधिकाऱ्यांच्या हजेरीत हाती घेतली होती. पण त्यानंतर संबंधितांच्या याचिकेनुसार उच्च न्यायालयाने स्थगिती दिल्याने ही कारवाई थांबवली होती.

यासंदर्भात मुख्याधिकारी चंद्रकांत शेटकर यांनी म्हापसा पोलिसांत तक्रार दाखल केली. दि. २८ रोजी जीवन उर्फ साबाजी मयेकर यांनी केलेले दुकानाचे बेकायदेशीर बांधकाम पाडण्याची प्रक्रिया नियोजित केली होती. सदर दुकान हटविण्याची प्रक्रिया अतिक्रमण हटाव पथकाने संयुक्त मामलेदार साईश नाईक, वीज कनिष्ठ अभियंता गौरेश गावकर, सांबाखाचे पर्यवेक्षक प्रदीप कांदोळकर, पोलीस अधिकारी , पालिका कनिष्ठ अभियंता संगीता सातार्डेकर, निरीक्षक शेखर गावस, पर्यवेक्षक सुनील नाईक व इतर अधिकाऱ्यांच्या उपस्थितीत सुरू केली.

त्यामुळे संबंधित संशयितांवर गुन्हा नोंद करावा, अशी विनंती २९ रोजी पाठवलेल्या या तक्रारी पत्राद्वारे मुख्याधिकारी चंद्रकांत शेटकर यांनी म्हापसा पोलिस स्थानकात केली होती. या पत्राची दखल पोलिसांनी घेऊन ही कारवाई केली आहे.

कामात अडथळा

सिध्दार्थ मयेकर, श्रीमती धुरी व विरेंद्र मयेकर (रा. शेट्येवाडा, म्हापसा) यांनी कारवाईत अडथळा आणला. तसेच विरेंद्र मयेकर यांनी आपली महिंद्रा बोलेरो गाडी जाणूनबुजून व चुकीच्या हेतूने दुकानासमोर उभी केली आणि अतिक्रमण हटाव पथकाच्या कामात अडथळा निर्माण केला. अधिकाऱ्यांना कर्तव्य शांततेत पार पाडण्यास प्रतिबंध केला,अशी तक्रार म्हापसा पालिकेचे मुख्याधिकारी चंद्रकांत शेटकर यांनी २९ रोजी केली होती.