डिचोली: ‘जंगल ज्यूस’ अशी ओळख असलेल्या आणि काजूबोंडुंच्या रसापासून मिळणाऱ्या शुद्ध ''निऱ्या'' ला मागणी असल्याचे आढळून येत आहे. मये भागात तर गेल्या काही दिवसांपासून रोज सायंकाळच्या वेळी रस्त्याच्या बाजूने ''नीरा'' विक्रीसाठी उपलब्ध होत आहे.

विशेषतः महिला निऱ्याची विक्री करताना आढळून येत आहे. निऱ्याच्या विक्रीतून कमाईही होत आहे. असंतुलीत हवामानामुळे यंदा काजू पिकावर परिणाम झाल्याने निऱ्याचे प्रमाणही कमी असल्याचे दिसून येत आहे.

डिचोलीतील बहुतेक ग्रामीण भागात काजू बोंडांच्या रसापासून हूर्राक, फेणी ही दारु उत्पादित करण्यात येते. ''नीरा'' हा दारूचा प्रकार नसला, तरी ज्याप्रमाणे पहिल्या धारेच्या 'हूर्राक' ला मागणी असते. त्याचप्रमाणे दारु गाळणीच्या प्रक्रियेपूर्वी काजू बोंडांच्या रसापासून मिळणाऱ्या ''निऱ्या''ला मागणी असते. स्वच्छ आणि निर्मळ तसेच पचनक्रिया आणि आरोग्यास उपयुक्त असलेल्या ''निऱ्या''ला मागणी प्रचंड असते.

१०० रुपये लिटर!

मयेत ''नीरा'' सहज उपलब्ध होत असल्याने गावातील महिलांसह बहूतेकजण निऱ्याच्या विक्री व्यवसायात आहेत. सायंकाळच्यावेळी तर मये तलावाजवळून नार्वेच्या दिशेने गेलेल्या रस्त्याच्या बाजूने महिलां मिळून स्थानिक निऱ्याची विक्री करताना आढळून येतात. त्यात पंधरा ते वीस महिलांचा समावेश असतो. १०० रुपये लिटर याप्रमाणे निऱ्याची विक्री करण्यात येत आहेत. निऱ्याच्या विक्रीतून स्थानिक महिलांची आर्थिक कमाई होत असते.