जानेवारीत उत्तर गोव्यात सुरू झालेल्या मनोहर आंतरराष्ट्रीय विमानतळामुळे राज्याच्या पर्यटनाला मोठी मदत झाली. पण, मोपा येथील या विमानतळामुळे दाबोळी विमानतळाच्या भवितव्याबाबत प्रश्न उपस्थित केले जात आहेत. पावसाळी अधिवेशनात विरोधकांनी पुन्हा एकदा हा मुद्दा उचलून धरत दाबोळीवरून मुख्यमंत्री सावंत यांना घेरले.

दरम्यान, दाबोळीचे भवितव्य आणि मोपाच्या महसूलाबाबत मुख्यमंत्री सावंत यांनी उत्तरं दिली.

दाबोळीवर उतरणारी आंतरराष्ट्रीय विमानांचे मनोहर विमानतळावर स्थलांतर केल्याने दाबोळी कालांतराने बंद होण्याची शक्यता आमदारांनी व्यक्त केली. विरोधी पक्षनेते युरी आलेमाव, विजय सरदेसाई, वीरेश बोरकर, मायकल लोबो, आलेक्स रेजिनाल्ड यांनी याबाबत प्रश्न विचारला.

त्यावर मुख्यमंत्री प्रमोद सावंत यांनी दाबोळी विमानतळ सुरूच रहावे यासाठी प्रयत्नशील असल्याचे सांगितले. दाबोळी विमानतळावरील विमानांची संख्या कायम राहावी यासाठी वाहतूक मंत्री माविन गुदिन्हो यांच्यासह शिष्टमंडळ केंद्रीय नागरी विमान वाहतूक मंत्र्यांची भेट घेणार असल्याचे सांगितले. तसेच, आंतरराष्ट्रीय विमानांचे मोपावर स्थलांतर केले जाऊ नये अशी मागणी करणार असल्याचे त्यांनी सांगितले.

तसेच, जानेवारीपासून सुरू झालेले मोपा येथील मनोहर आंतरराष्ट्रीय विमानतळातून मे 2024 पासून राज्याला महसूल सुरू होईल असेही मुख्यमंत्री सावंत म्हणाले. राज्य सरकारचे या विमानतळात 37.6 टक्के शेअर्स आहेत. सध्या या विमानतळाचा कारभार GMR कंपनीकडे आहे.

दाबोळी विमानतळ घोस्ट विमानतळ होण्याच्या मार्गावर असल्याची भीती विरोधी पक्षनेते युरी आलेमाव यांनी व्यक्त केली. दाबोळी कार्यान्वित असले तरी येथे फार विमाने येत नाहीत. त्यासाठी मुख्यमंत्री सावंत यांनी आर्थिक आराखडा तयार करण्याची गरज आहे असे आलेमाव म्हणाले.