पणजी: इंजिन बंद पडल्याने हवेमुळे आग्वाद किनाऱ्यावरील खडकात गुरुवारी अडकलेल्या क्रूझ बोटीला मिरामारपासून पुढे खोल समुद्रात जाण्यास परवानगी दिलीच कशी? खराब हवामान असल्याची सूचना मिळूनही बोट मालकाने पर्यटकांच्या जिवाशी खेळ केल्याचे स्पष्ट दिसते?

असे प्रश्न उपस्थित होत असल्याने बंदर कप्तान खाते आणि पर्यटन खात्याने या घटनेची गंभीर दखल घेतली आहे. बंदर कप्तान खात्याचे कॅप्टन ऑक्टिवो फर्नांडिस यांनी संबंधित बोट मालकावर कडक कारवाई करण्यात येईल, अशी माहिती ‘गोमन्तक''ला दिली.

फर्नांडिस यांनी सांगितले की, पर्यटक सेवा देणाऱ्या खासगी क्रूझ बोट मालकांचा व्हॉट्सॲप ग्रुप आहे, या ग्रुपवर दररोज हवामान खात्याकडून सर्वांना सूचित केले जाते. गुरुवारीही या ग्रुपवर खराब हवामानाचा संदेश देण्यात आला.

तरीही पर्यटकांना खराब हवामान असतानाही खोल समुद्रात जाणे नियमाचे उल्लंघन ठरते. मिरामारपर्यंत क्रूझ बोट मांडवी नदीतून विहार करू शकते, परंतु समुद्रात जाऊ शकत नाही, असे ते म्हणाले. संबंधितावर कडक कारवाई केली जाईल, असेही त्यांनी नमूद केले.

३८ पर्यटकांना जीवरक्षकांनी काढले बाहेर

दरम्यान, आग्वाद येथील खाडीजवळ खडकाळ भागात अडकलेल्या क्रूझ बोटीतील ३८ पर्यटकांना आणि एका डिंगी बोटीतील चार जणांना दृष्टी मरीनच्या जीवरक्षकांनी गुरुवारी रात्री यशस्वीरीत्या बाहेर काढले.