Nilesh Cabral: आमदार नीलेश काब्राल यांचे मंत्रिपद काढून घेतल्याने त्यांच्या समर्थकांनी पक्षाच्या या निर्णयाबद्दल नाराजी व्यक्त केली. सोमवारी सकाळपासून त्यांच्या समर्थकांनी काब्राल यांची भेट घेतली आणि आम्ही आपल्यासोबत आहोत, अशी ग्वाही मतदारांनी दिली.

काब्राल यांचे मंत्रिपद त्यांना परत द्यावे, निर्णय बदलला नाही तर आम्ही लोकसभेत भाजपविरुद्ध मतदान करू, असा इशारा संतप्त कार्यकर्त्यांनी दिला. ज्याप्रमाणे त्यांच्यावर आरोप करून मंत्रिपद काढून घेतले, हे आमच्यासाठी धक्कादायक आहे, कारण आमच्या आमदारावर आमचा पूर्ण विश्वास आहे. आम्ही पक्ष पाहून मतदान केलेले नाही, तर काब्रालांसाठी भाजपाला मतदान केले.

आमच्या आमदारांनाच का काढले गेले, याचे उत्तर पक्षाने दिले पाहिजे, कारण काही तालुक्यातील अनेकांना मंत्रिपदे दिली असून त्यांचे मंत्रिपद का काढले गेले नाही? असा प्रश्न त्यांनी उपस्थित केला.

काब्राल यांनी आपण पक्षाचा प्रामाणिक सेवक असून पक्षाने जो निर्णय घेतला, त्याचे आपण पालन केले आहे, असे सांगितले.

आपण मंत्रिपदी असताना पूर्णवेळ मतदारसंघासाठी देऊ शकत नव्हतो, पण आता आपल्याकडे भरपूर वेळ असल्याने मतदारसंघातील अपूर्ण असलेली कामे मुख्यमंत्री प्रमोद सावंत यांच्या सहकाऱ्यांने ती पूर्ण करणार आहे, असेही यावेळी स्पष्ट केले.

काब्राल म्हणाले, आपले फक्त मंत्रिपद गेले आहे, पण मी आमदार आहे. या कार्यकाळात मी मतदारसंघाचा विकास करणार आहेत.

आरोप सिद्ध झाले तर...

गेल्या बारा वर्षांच्या कार्यकाळात मी कुडचडे मतदारसंघात अनेक विकास कामे मार्गी लावली असून लोकांना माझी काम करण्याची पद्धत माहीत आहे. काकोडा येथील कचरा प्रक्रिया प्रकल्पावरून विरोधकांनी लोकांची दिशाभूल केली, पण हा प्रकल्प आमच्यासाठी बराच फायद्याचा आहे. जे आरोप माझ्यावर करण्यात आले, त्यात काहीही तथ्य नसून जर नोकर भरती घोटाळा सिद्ध झाल्यास मी आमदारकीचा राजीनामा देणार आहे, असेही काब्राल म्हणाले.