पणजी: काँग्रेसचे अध्यक्ष मल्लिकार्जुन खर्गे १७ रोजी गोवा दौऱ्यावर येत आहेत, परंतु त्यांच्या मार्गदर्शनासाठी आम्ही जाहीर सभांचे आयोजन केले होते. त्यासाठी ज्या सरकारी जागा आम्ही मागितल्या, त्या जागा आम्हाला नाकारण्यात आल्या. त्यामुळे आम्हाला खासगी जागेवर सभेचे आयोजन करावे लागले असल्याचा आरोप काँग्रेसचे प्रदेशाध्यक्ष गिरीश चोडणकर यांनी केला आहे.

चोडणकर म्हणाले, पक्षाचे राष्ट्रीय अध्यक्ष खर्गे हे गोव्यात पक्षाच्या कार्यकर्त्यांना मार्गदर्शन करण्यासाठी येत आहेत. त्यानुसार प्रदेश काँग्रेसतर्फे नियोजन केले होते. आम्ही सुरुवातीला त्यांच्या सभेसाठी मडगावातील एसजीपीडीए मैदान मागितले ते आम्हाला नाकारण्यात आले.

त्यानंतर आम्ही पणजी महानगरपालिकेकडे आझाद मैदान मागितले, त्यांनी आम्हाला उद्या या आणि पैसे भरा असे सांगितले. त्यानंतर भाजपकडून आझाद मैदान आरक्षित केले गेले.

ताळगाव कम्युनिटी हॉल आणि सांताक्रूझ येथील श्यामाप्रसाद स्टेडियम ही ठिकाणेही सभेसाठी घेण्याचा प्रयत्न केला, परंतु तेथेही आम्हा ला नाकारण्यात आल्याचा आरोप चोडणकर यांनी केला.

अशी परवानगी मागितली नाही: तवडकर

क्रीडा आणि युवा व्यवहारमंत्री रमेश तवडकर यांनी सांगितले की, गोवा प्रदेश काँग्रेसने क्रीडा आणि युवा व्यवहार खात्याकडे सभेसाठी मैदान किंवा स्टेडियमची मागणी केलेली नाही.