Goa Crocodile Video: गोव्यात घरात घुसली भलीमोठी मगर; कुटुंबाची उडाली तारांबळ, वन विभागाकडून मगरीची सुरक्षित सुटका

Crocodile Enters House In Khandepar: गोव्यातील खांडेपार परिसरात एका घरात मगर शिरल्याने मोठी खळबळ उडाली. घरात मगर आल्याचे लक्षात येताच कुटुंबातील सदस्यांची चांगलीच तारांबळ उडाली. अचानक घरात आलेल्या या अनपेक्षित पाहुण्यामुळे काही काळ परिसरात भीतीचे वातावरण निर्माण झाले. कुटुंबीयांनी तात्काळ सुरक्षित ठिकाणी धाव घेतली. दुसरीकडे, घटनेची माहिती मिळताच स्थानिकांनीही घटनास्थळी गर्दी केली. घरात मगर शिरल्याची बातमी परिसरात पसरताच नागरिकांमध्येही उत्सुकता आणि भीतीचे वातावरण निर्माण झाले.

दरम्यान, मगरीला बाहेर काढण्यासाठी संबंधित यंत्रणेला माहिती देण्यात आली. प्रशिक्षित पथक घटनास्थळी दाखल झाल्यानंतर मगरीला पकडण्यासाठी बचावकार्य सुरु करण्यात आले.

मगरीची अखेर सुरक्षित सुटका

अथक प्रयत्नांनंतर घरात शिरलेल्या मगरीला सुरक्षितरित्या पकडण्यात यश आले. बचाव पथकाने काळजीपूर्वक मगरीला ताब्यात घेतले. या कारवाईदरम्यान कोणतीही अनुचित घटना घडली नसल्याची माहिती आहे. मगरीची सुरक्षित सुटका झाल्याने घरातील सदस्यांसह परिसरातील नागरिकांनीही सुटकेचा नि:श्वास सोडला.

या घटनेचा व्हिडीओ समोर आला असून, घराच्या परिसरात मगर आल्याचे दृश्य पाहायला मिळत आहे. पावसाळ्यात (Rain) नदी, नाले आणि जलाशयांमधील पाण्याची पातळी वाढल्याने वन्यजीव मानवी वस्तीकडे येण्याच्या घटना घडू शकतात. त्यामुळे अशावेळी नागरिकांनी सतर्क राहण्याचे आवाहन करण्यात येत आहे.