गोव्यात भाजपचे 'ऑपरेशन लोटस' यशस्वी झाले असून, जेष्ठ काँग्रेस नेते दिगंबर कामत, मायकल लोबो यांच्यासह आठ आमदार भाजपमध्ये सामिल झाले आहेत. काँग्रेसची देशात भारत जोडो यात्रा सुरू असताना गोव्यात मात्र काँग्रेसला मोठा झटका बसल्याने, राजकीय वर्तुळात चर्चाना उधाण आले आहे. काँग्रेसने मात्र भाजप टिका करत गोव्यातील बंडाला "ऑपरेशन किचड" म्हटले आहे. पैसा, मंत्रीपदे आणि इतर प्रलोभने दाखवून विरोधी पक्ष संपविण्याचे भाजपचे प्रयत्न आहेत. असा आरोप काँग्रेस नेत्यांनी केला आहे.

काँग्रेसचे जेष्ठ नेते पवन खेरा यांनी भाजपवर निशाना साधत, "काँग्रेसच्या भारत जोडो अभियानाला भाजप भयभित झाले आहे. 'ऑपरेशन किचड'च्या रूपानं त्याचा परिणाम गोव्यात दिसून आला. मागील काही दिवसांपासून भाजपचे हा प्रयत्न सुरू होते. त्यासाठी पैशांचे लालच, एजन्सीकडून, गुंडाकडून धमकी दिल्या जातात. पक्ष अवघड मार्गाने वाटचाल करत आहे. या रस्त्यावर तोच वाटचाल करू शकतो जा या मार्गावर कितीही संकटे आली तरी हा मार्ग सोडणार नाही."

माजी केंद्रिय मंत्री, काँग्रेसचे जेष्ठ नेते जयराम रमेश यांनी देखील भाजपवर टिका केली आहे. "भारत जोडो यात्रेचे यश पाहून, भाजपने गोव्यात ऑपरेशन किचड फास्टट्रॅक केले आहे. दररोज चुकीची माहिती प्रसारित करून दिशाभूल करण्याचे प्रयत्न केले जाताहेत. आम्ही भाजपचे हे घाणेरडे राजकारण दूर करू." असे जयराम रमेश यांनी आपल्या ट्विटमध्ये म्हटले आहे.

"तृणमूल काँग्रेसचे नेते डेरेक ओ ब्राईन म्हणाले, आम्हाला माहिती होते हे एक दिवस होणारच होते. आम्हाला माहित होते हे बदमाश तुम्हाला निराश करतील. तृणमूल काँग्रेसवर विश्वास ठेवा, आम्ही प्रत्येकवेळी तुमच्यासाठी उपलब्ध असेन." असे ट्विट डेरेक ओ ब्राईन यांनी केले आहे.