पणजी: आगामी गोवा निवडणुकीच्या पार्श्वभूमीवर अनेक नेते पक्षांतर करत आहेत. मागील काळात या पक्षांतराचा सगळ्यात जास्त फटका कॉंग्रेस पक्षाला बसला होता. एक वेळ अशी आली होती की, गोवा कॉंग्रेसमध्ये फक्त 2 आमदार शिल्लक होते. इतिहासाची पुनरावृत्ती होऊ नये म्हणून कॉंग्रेसने एक वेगळी शक्कल लढवली आणि सर्व उमेदवारांकडून पक्षांतर न करण्याचे वचन घेण्यात आले. काँग्रेसच्या सर्व उमेदवारांनी निवडणुकीनंतर (Goa Assembly Elections 2022) पक्षांतर करणार नसल्याची शपथ देवी महालक्ष्मी आणि‌ बांबोळी येथील क्रॉससमोर घेतली. यावर भाजपचे प्रदेशाध्यक्ष सदानंद शेट तानावडे यांनी भाष्य केले. (Goa Politics: Congress does not trust its candidates Sadanand Shet Tanavade)

तानावडे म्हणाले, "काँग्रेसचा (Congress) आपल्या उमेदवारांवर विश्वास नसल्यामुळेच पक्षाने त्यांना धार्मिक स्थळांवर शपथ घेयला लावली. राजकीय पक्षाने असे कृत्य करू नये. याचा आम्ही निषेध करतो. आपल्याच उमेदवारांवर विश्वास नसल्याने कॉंग्रेस पक्ष हे करत आहे."

“कॉंग्रेसला माहिती आहे की 2022 च्या निवडणुकीत त्यांना बहुमत मिळू शकत नाही आणि भाजप निवडणूक जिंकेल. त्यामुळे आपले उमेदवार आपल्याला सोडून जातील, अशी भीती त्यांना वाटत आहे. ज्या पक्षाकडे बहुमत आहे त्याला कोणीही सोडणार नाही," असे तानावडे पुढे म्हणाले.

याचसंदर्भात गोवा कॉंग्रेस प्रभारी पी. चिदंबरम (P Chidambaram) यांनी आपले मत स्पष्ट केले आहे. ते म्हणाले, "गोव्यात (Goa) इतर राज्यांच्या तुलनेत सर्वाधिक पक्षांतर झाले आहे. निवडणूक तोंडावर असतानाही राजकीय नेते पक्षांतर करत आहेत. त्यामुळे उमेदवारांनी घेतलेली शपथ आवश्यक होती. आम्हाला आशा आहे की गोव्यातील लोक काँग्रेसवर विश्वास ठेवतील."