लोबो, जोशुआकडून आचारसंहितेचं उल्लंघन; गुन्हा दाखल

पणजी : निवडणूक आचारसंहितेचा भंग केल्याप्रकरणी पोलिसांनी विविध राजकीय पक्षांच्या चार उमेदवारांविरुद्ध गुन्हा दाखल केला आहे. यासंदर्भात निवडणूक अधिकाऱ्यांनी संबंधित उमेदवारांना बजावलेल्या कारणे दाखवा नोटिसीला उत्तर न दिल्याने ही कारवाई करण्यात आली आहे. या गुन्ह्याची प्रत मुख्य निवडणूक कार्यालयालाही पाठवण्यात आली आहे. गुन्हा दाखल झालेल्यांमध्ये माजी मंत्री मायकल लोबोंसह तीन काँग्रेसचे आणि एका भाजप उमेदवाराचा समावेश आहे. (Michael Lobo and Joshua Dsouza News Updates)

निवडणूक आयोगाने राजकीय पक्ष व उमेदवारांना कोरोनाच्या वाढत्या प्रादुर्भावाच्या पार्श्‍वभूमीवर जाहीर सभा घेण्यास तसेच घरोघरी प्रचार करताना पाचपेक्षा अधिक लोकांना सोबत घेऊन प्रचारास मनाई केली आहे. कोरोनासारख्या महामारीचा प्रसार रोखण्यासंदर्भात जिल्हाधिकाऱ्यांनी कलम 144 जारी केले आहे. कळंगुटचे काँग्रेस उमेदवार मायकल लोबो (Michael Lobo) तसेच साळगाव येथील काँग्रेसचे केदार नाईक हे घरोघरी प्रचार करताना मोठ्या प्रमाणात कार्यकर्ते व समर्थक त्यांच्यासोबत फिरत असल्याची तक्रार म्हापसा येथील भरारी पथकाकडे आली होती.

म्हापशाचे भाजपचे (BJP) उमेदवार जोशुआ डिसोझा तसेच काँग्रेसचे उमेदवार सुधीर कांदोळकर, शिवोलीत दिलायला लोबो, तसेच पेट्रिक सावियो आल्मेदा यांनीही निवडणूक आचारसंहितेचे उल्लंघन केल्याबद्दल त्यांच्याविरोधात गुन्हा दाखल केल्याची माहिती रात्री उशिरा मिळाली.

भाजप नेते दत्ता खोलकरही लक्ष्य

म्हापसा निर्वाचन अधिकाऱ्यांनी संबंधित उमेदवारांना कारणे दाखवा नोटिसा बजावून त्यांच्याकडून उत्तर मागितले होते. मात्र, त्यांनी त्याला उत्तर न दिल्याने म्हापसा (Mapusa) पोलिसांनी गुन्हा दाखल केला आहे. या घटनांची माहिती केंद्रीय निवडणूक आयोगाकडेही पाठविली जाणार आहे. साळगाव मतदारसंघातील सांगोल्डा येथे साईबाबा मंदिरात महिलांची सभा घेतल्याप्रकरणी भाजप नेते दत्ता खोलकर यांच्याविरुद्ध साळगाव पोलिसांनी गुन्हा दाखल केला आहे.