पणजी: इंधन पुरवठा करणाऱ्या कंपन्यांकडून राज्यात अद्यापही व्यावसायिक गॅस सिलिंडरचा पुरवठा सुरळीत झालेला नाही. याचा थेट परिणाम हॉटेल व्यवसायावर होत आहे. येथील सांतिनेज परिसरातील दोन लहान हॉटेल्‍स सोमवारी बंद असल्‍याचे दिसून आले.

आखातातील युद्धामुळे देशभर गॅस सिलिंडर पुरवठ्यावर परिणाम झाला आहे. त्याचा फटका गोव्‍यालाही बसत आहे. राज्यातील प्रमुख वितरकांकडून व्यावसायिक सिलिंडरचा पुरवठा नियमित होत नसल्याने हॉटेलमालक अडचणीत सापडले आहेत.

सध्या साठाच उपलब्ध नसल्याने व्यावसायिक सिलिंडर देणे कठीण होत असल्याचे हिंदुस्थान पेट्रोलियमचे वितरण अधिकारी दीपक शहा यांनी सांगितले.राजधानी पणजीतील बहुतांश हॉटेल व्यवसाय पूर्णपणे गॅस सिलिंडरवर अवलंबून आहे. काही हॉटेलमालकांनी गोवा नॅचरल गॅसचे कनेक्शन घेतले असल्याने त्यांचा व्यवसाय सुरळीत सुरू आहे.

दरम्यान, ‘स्मार्ट सिटी’अंतर्गत राजधानीत रस्त्यांचे काम झाले असले तरी अनेक ठिकाणी गॅसवाहिन्या टाकण्यात आलेल्या नाहीत. गार्सिया उद्यान परिसरातील हॉटेल्‍सना गॅसवाहिनी नसल्याने ही सेवा घेता आलेली नाही.

सांतिनेजमधील ‘बोरकर कॅफे’ला काही दिवसांपासून गॅस सिलिंडर मिळत नव्हता. अनेक ठिकाणी प्रयत्न करूनही सिलिंडर उपलब्ध न झाल्याने अखेर सोमवारी हे हॉटेल बंद ठेवावे लागले. शिवाय याच परिसरातील ‘नवदुर्गा’ हॉटेलही सोमवारी बंद होते.