Goa Crime News: चिखली येथे शुल्लक कारणावरून एकमेकांवर सुरी हल्ला केल्याच्या आरोपाखाली कोलवाळ पोलिसांनी परस्परविरोधी गुन्ह्यांखाली संशयित आरोपींना अटक केली. विश्वास गजानन पावसे (24, रा. रामनगर कोलवाळ) व साईश शिवाजी हिप्पालकर (31, रा. न्यू वाडो, चिखली) अशी संशयितांची नावे आहेत.

ही घटना शुक्रवारी रात्री 9 च्या सुमारास चिखली येथील दत्त मंदिराजवळ घडली. संशयित पावसे याने हिप्पालकर यास भिकारी म्हणून हिणवले आणि त्याच्या दुचाकीवर लाथ मारून त्याला खाली पाडले. त्यानंतर दोघांत हाणामारी झाली व त्यांनी एकमेकांवर सुरी हल्ला केला. यात हिप्पालकर याची छाती व पायावर सुरीचे घाव झाले.

तर पावसे याच्या छातीवर आणि उजव्या हातावर घाव झाला. घटनेची माहिती मिळताच पोलिसांनी रक्तबंबाळ अवस्थेतील दोन्ही जखमी संशयितांना म्हापसा इस्पितळात दाखल केले. संशयितांना शनिवारी डिस्चार्ज मिळाल्यानंतर पोलिसांनी परस्परविरोधी गुन्हा नोंदवून अटक केली.