Goa SSC Exam : राज्यातील ज्यांनी इयत्ता आठवी, दहावीत शाळा सोडलेली आहे, जे मानव संसाधन विकास महामंडळात सिक्युरिटी म्हणून कार्यरत आहेत, असे लोक आपल्या बढतीसाठी दहावी ‘एक्स्टरनल’ परीक्षा परराज्यात जाऊन देतात.

त्यांना सुमारे २५ हजार ते ४० हजार रूपये खर्च येतो. गोवा बोर्डाने बहिस्थः विद्यार्थ्यांसाठीची ‘एक्स्टरनल’ दहावी परीक्षेची प्रक्रिया सुटसुटीत करावी, जेणेकरून गोव्यात कोणी दहावी नापास राहणार नाहीत, असे प्रतिपादन मुख्यमंत्री डॉ. प्रमोद सावंत यांनी केले.

गोवा शालान्त मंडळाच्या सुवर्णमहोत्सवी वर्षाच्या कार्यक्रमादरम्यान मुख्यमंत्री सावंत बोलत होते. यावेळी माहिती तंत्रज्ञान मंत्री रोहन खंवटे, आमदार दाजी साळकर, शिक्षण संचालक शैलेश झिंगडे, गोवा शालान्त मंडळाचे अध्यक्ष भगीरथ शेट्ये व इतर उपस्थित होते. दरम्यान डॉ. सावंत म्हणाले, आता येणारी पिढी ‘जेन झी’ आणि ‘जेन अल्फा’ आहे त्यांचे योग्य भवितव्य घडविण्याची जबाबदारी तुम्हा शिक्षकांच्या हाती आहे, असेही त्यांनी सांगितले.

आता वास्तुविशारद महाविद्यालय, कला महाविद्यालय या इमारतीच्या प्रकल्पासाठी आम्ही ‘इन हाऊस’ सल्लागार नेमत आहोत ज्यामुळे २ टक्के फी वाचते त्यासोबतच इमारतींमध्ये गोमंतकीय कला, चित्रे यांना प्राधान्य देण्यात येत आहे. ‘जीएसआयडीसी’ने उभारलेल्या इमारतींमध्ये देखील गोमंतकीय कलाकारांनी साकारलेली चित्रे लावण्यास प्राधान्य दिले जात आहे, असे मुख्यमंत्री डॉ. सावंत यांनी सांगितले.

विद्यार्थ्यांचे कौशल्य ओळखा!

आज जे विद्यार्थी शिकत आहेत ते सर्वजण डॉक्टर किंवा अभियंते होऊ शकत नाहीत. त्यामुळे त्या विद्यार्थ्यांमधील कौशल्य आणि कला ओळखून त्यात त्यांनी अधिक प्रवीण व्हावे, यासाठी मार्गदर्शन शिक्षकांनी करावे. हे काम पालक करू शकत नाहीत, विद्यार्थ्यांना योग्य मार्ग दाखविण्याचे कार्य शिक्षकांनीच केले पाहिजे हे त्यांचे कर्तव्य असल्याचे मुख्यमंत्री डॉ. सावंत यांनी सांगितले.

‘आयटीआय’साठी दहावी प्रमाणपत्र देणे सुरू

जे विद्यार्थी, आठवी आणि दहावीनंतर आयटीआयमध्ये प्रवेश घेतात त्यांना दहावी प्रमाणपत्र देण्यास सुरूवात करण्यात आली आहे. पूर्वी भाषा व इतर पेपर द्यावे लागायचे परंतु ही प्रक्रिया देखील आता सुटसुटीत करण्यात आली आहे, असे मुख्यमंत्री डॉ.सावंत यांनी सांगितले.