म्हापसा: हडफडे येथील बर्च बाय रोमियो लेन क्लबमधील भीषण अग्नितांडवानंतर प्रशासकीय यंत्रणा खडबडून जागी झाली. सरकारने नियुक्त केलेल्या अंमलबजावणी पथकाकडून, किनारी भागांतील क्लबच्या तपासणीचा सपाटा लावला.

परिणामी, डिसेंबरच्या मध्यात अनिवार्य सुरक्षा नियमांचे पालन न केल्याबद्दल तब्बल सहा क्लब सील करण्यात आले. परंतु, हे क्लब ३१ डिसेंबरपासून पुन्हा नव्या दमाने सुरू झाल्याची माहिती मिळत आहे.

सरकार नियुक्त संयुक्त अंमलबजावणी व देखरेख समितीला तपासणीवेळी सुरक्षा नियमांचे गंभीर उल्लंघन आढळल्यानंतर, सालुद, मायान बीच क्लब, डियाझ, कॅफे सीओ-२, गोया, क्लारा हे क्लब सील केले होते. मात्र, थर्टी फर्स्टला यातील चार क्लबचे सील हटविण्यात आले. याठिकाणी ‘न्यू इअर’च्या पार्ट्या वाजल्याचे सूत्रांनी सांगितले. सध्या हे क्लब सुरू आहेत.

यासंदर्भात, अग्निशमन दलाकडून माहिती घेण्याचा प्रयत्न केला असता, अधिकारी फोन उचलत नव्हते. मध्यंतरी, अग्निशमन दल संचालकांनी आम्ही कुणालाच ‘एनओसी’ दिल्या नाहीत, असे ‘ऑन रेकॉर्ड’ नमूद केले होते. मात्र, प्रशासकीय अधिकाऱ्यांच्या दाव्यानुसार, ज्या क्लबने ‘फायर-सेफ्टी एनओसी’ दिल्या, ते उघडल्याचे नमूद केले.

त्यामुळे खाते व अधिकाऱ्यांच्या एकंदर तोंडी माहितीमुळे एकप्रकारे संभ्रम निर्माण झाला आहे. बर्च दुर्घटनेनंतर, प्रशासकीय यंत्रणा तसेच सरकार खरोखर या अनधिकृत गोष्टींविषयी गंभीर असल्याचे दिसले. परंतु, पुन्हा एकदा संबंधित क्लबचे सील उघडल्याने, हा प्रकार लोकांच्या तोंडाला पाने पुसण्याचा होता का?, असा सवाल उपस्थित होतोय.