High Court on Illegal Shack in Goa: कांदोळी-कळंगुट किनारपट्टी क्षेत्रात विनापरवाना उभारलेल्या 161 शॅक्स बंद करण्याचे आदेश मुंबई उच्च न्यायालयाच्या गोवा खंडपीठाने मंगळवारी दिले. खंडपीठाने उत्तर गोव्याच्या जिल्हाधिकाऱ्यांना याबाबतचे आदेश दिले आहेत.

खंडपीठाने म्हटले आहे की, गोवा राज्य प्रदुषण नियंत्रण मंडळाने (GSPCB) कळंगुट-कांदोळी परिसरात एकूण 161 शॅक विनापरवाना सुरू असल्याचे म्हटले होते. या शॅक्सनी राज्य प्रदुषण नियंत्रण मंडळाची कोणतीही परवानगी घेतलेली नाही.

त्यामुळे त्यांच्यावर कारवाईबाबत GSPCB क्लोजर ऑर्डर जारी केली होती. त्याच्या अंमलबजावणीची खात्री करावी, असे खंडपीठाने जिल्हाधिकाऱ्यांना सांगितले आहे.

या शॅक बंद करण्यासाठी जिल्हाधिकारी स्थानिक पोलिसांचे सहकार्य घेऊ शकतात. गोवा राज्य प्रदुषण नियंत्रण मंडळ आणि जिल्हाधिकाऱ्यांनी याबाबत 5 एप्रिलपर्यंत अहवाल द्यावा, असे निर्देश उच्च न्यायालयाने दिले आहेत.

संमतीविना सुरू असलेल्या या शॅक्सविरुद्ध कायद्यानुसार कोणती कारवाई करणे शक्य आहे, यासंदर्भातील माहिती द्यावी, असे निर्देश सोमवारीच गोवा खंडपीठाने राज्य प्रदूषण नियंत्रण मंडळ आणि पर्यटन खात्याला दिले होते.

राज्यातील समुद्रकिनाऱ्यावर पर्यटन खात्याने शॅक्स उभारण्यास परवानगी दिली आहे. यानुसार प्रत्येक शॅक्स चालकाने राज्य प्रदूषण नियंत्रण मंडळाची परवानगी घ्यायला हवी. मात्र, कांदोळी-हणजूण परिसरात काही शॅक्स चालकांकडे ही संमती नसल्याचा दावा एका जनहित याचिकेत करण्यात आला होता.

यावर खंडपीठाने प्रदूषण नियंत्रण मंडळाला यासंदर्भात तपासणी करून अहवाल मागितला होता. या तपासणीत बहुतेकांकडे परवानगी नसल्याचे समोर आले होते.