Miramar Beach : गोवा सरकार व मुख्यमंत्री डॉ. प्रमोद सावंत यांच्या संयुक्त विद्यमाने राज्यात योगगुरु रामदेव बाबा यांचे तीन दिवसीय योग शिबीर आयोजित करण्यात आले आहे. या शिबीरासाठी विद्यार्थी व शिक्षकांना उपस्थित राहण्याचे आदेश शिक्षण खात्याकडून देण्यात आले आहेत. राज्यातील विद्यार्थ्यांसाठी व शिक्षकांसाठी विशेष शिबिर घेण्यात येणार आहे.

राज्यात योगगुरु रामदेव बाबा यांचे तीन दिवसीय योग शिबिर आयोजित करण्यात आले आहे. हे शिबीर मिरामार समुद्रकिनाऱ्यावर 18 ते 20 फेब्रुवारी या काळात होणार आहे. योग शिबिर दररोज पहाटे 5 ते सकाळी 7.30 या वेळेत होणार आहे.

या शिबिरात रामदेव बाबा पहाटे 4.45 वाजता उपस्थित राहणार आहेत. 20 फेब्रुवारीला सायंकाळी 4 ते 6 या वेळेत राज्यातील सरकारी, अनुदानित व विनाअनुदानित अशा सर्व प्राथमिक, माध्यमिक, उच्च माध्यमिक शाळांतील शिक्षक व विद्यार्थ्यांसाठी यावेळी विशेष शिबिर घेण्यात येणार आहे.

सर्व शिक्षकांसह एनएसएस, एनसीसी, स्काऊट व गाईडच्या विद्यार्थ्यांना या शिबिरासाठी उपस्थित राहण्याचे तसेच यावेळी विद्यार्थी व शिक्षकांनी वाहतुकीसाठी बालरथचा वापर करावा असे आदेश शिक्षण खात्याकडून देण्यात आले आहेत. याबाबतचे परिपत्रक खात्याकडून जारी करण्यात आले आहे.