Churchill Alemao : राजकारणातून निवृत्तीचा आपला विचार होता, पण लोक आपणाला ते करू देत नाहीत. उलट आपण लोकसभा निवडणूक लढवावी म्हणून ते आग्रह करू लागले आहेत, असे बाणावलीचे माजी आमदार चर्चिल आलेमाव यांनी पत्रकारांशी बोलताना सांगितले.

1990 मधील कालखंडात अठरा दिवस मुख्यमंत्री राहिलेले चर्चिल पुढे म्हणाले, की त्या अल्पकाळात आपण जे काही निर्णय घेतले व प्रकल्प सुरू केले ते गोव्याला दीर्घकाळ लाभ देणारे ठरले आहेत. आपण सदैव लोकांबरोबर रहाणारा आहे व म्हणूनच लोकही आपणाबरोबर असतात.

खासदार म्हणून दोनदा दक्षिण गोव्यातून लोकसभेवर गेलेले 73 वर्षीय चर्चिल पुढे म्हणाले, आगामी दिवसात आपण कुठे असेन याची कल्पना लोकांना लवकरच येईल. नुकत्याच पार पडलेल्या पंचायत निवडणुकीच्या निकालाप्रती त्यांनी समाधान व्यक्त केले व म्हटले की, मतपत्रिका हीच विधानसभा मतदानासाठी उचित पध्दत आहे. बाणावलीत आपण पाठिंबा दिलेले बहुतेक उमेदवार निवडून आल्याचा दावा करतानाच या निवडणुकीत राजकीय पक्षांनी पाठिंबा दिलेल्यांना पडलेली मते पाहिली, तर विधानसभा निवडणुकीत आरजीला पडलेली मते यावेळी कुठे गेली असा प्रश्न उपस्थित होतो. त्यांनी आपवरही निशाणा साधला व त्या पक्षाच्या मोफत विजेच्या आश्वासनाचे काय झाले असा सवाल केला.

मतदान यंत्रांच्या वापराबाबत संशय

चर्चिल आलेमाव यांनी मतदान यंत्रांच्या वापराबाबत संशय घेताना त्याबाबत आपणाला अधिक भाष्य करायचे नाही, पण पंचायत निवडणुकीच्या निकालाने बरेच काही दाखवून दिल्याचे त्यांनी नमूद केले.