साखळी: फेब्रुवारीमध्ये होणाऱ्या गोवा विधानसभा निवडणुकीसाठी सर्व पक्ष आपले तगडे उमेदवार घोषित करत आहेत. त्यामुळे गोव्यातील अनेक मतदार संघात चुरशीची लढाई होणार असे चित्र समोर येत आहे. यातच साखळी मतदार संघात बदलत असलेल्या राजकीय समीकरणाने सर्वांचे लक्ष वेधले आहे. (Pramod Sawant Goa Election Latest News)

साखळीमध्ये मुख्यमंत्री सावंत विरुद्ध कॉंग्रेस नेते धर्मेश सगलानी अशी लढत होणार आहे. मात्र, कॉंग्रेस (Congress) उमेदवार धर्मेश सगलानी यांचे निकटवर्तीय मानले जाणारे साखळीचे माजी नगराध्यक्ष तथा काँग्रेस नेते रियाज खान यांनी थेट मुख्यमंत्री प्रमोद सावंत (Pramod Sawant) यांना पाठिंबा दिला आहे.

यामुळे कॉंग्रेसमधील अंतर्गत वाद चव्हाट्यावर आला आहे. भाजपच्या (BJP) उमेदवाराला कॉंग्रेस नेत्याने पाठिंबा दिल्याने साखळीतील लढत ही सर्वांसाठी चर्चेचा विषय ठरत आहे. कॉंग्रेस उमेदवार धर्मेश सगलानी हे निवडणुकीत बाजी मारण्यासाठी काय खेळी करतात याकडे सर्वांचे लक्ष लागले आहे. काँग्रेस नेते रियाज खान यांचा पाठिंबा मुख्यमंत्री प्रमोद सावंत यांच्यासाठी किती फायदेशीर ठरतो हे देखील बघावे लागेल.

काँग्रेसने तिसऱ्या उमेदवारी यादीत सगलानी यांचे नाव जाहीर केले होते. सगलानी यांनी 2017 मध्येही मुख्यमंत्र्यांना कडवी लढत दिली होती. यावर्षी साखळी मतदार संघाकडे सर्वांचे लक्ष लागले आहे.