Sanquelim Municipality साखळी नगरपालिकेच्या पहिल्याच बैठकीत मुख्यमंत्री डॉ. प्रमोद सावंत यांनी विविध विकास प्रकल्पांबाबत मार्गदर्शन केले.

पालिकेतर्फे विचाराधीन असलेल्या विविध विकास प्रकल्पाचे ठराव घेऊन ते सरकार दरबारी द्यावे, पाठपुरावा करावा. हे सर्व प्रकल्प अमलात आणून साखळीचा गतीने विकास करावा, असे मुख्यमंत्री डॉ. प्रमोद सावंत यांनी सांगितले.

नगराध्यक्ष रश्मी देसाई, उपनगराध्यक्ष आनंद काणेकर व सर्व सहकारी नगरसेवक, नगरसेविका, मुख्याधिकारी कबीर शिरगावकर, पालिका अभियंता व इतरांची उपस्थिती होती.

पालिका इमारतीत असलेल्या 16 दुकानांचा दीर्घकाळ प्रलंबित असलेला विषय या बैठकीत सोडविण्यात नगरपालिका मंडळाला यश आले.

या 16 दुकानमालकांना सरकारी दरानुसार लावण्यात आलेले भाडे परवडत नसल्याने त्यांनी सदर भाडेदर कमी करण्याची मागणी केली होती. नगरपालिका मंडळाच्या बैठकीत या विषयावर सविस्तर चर्चा झाली.

मुख्यमंत्र्यांनीही याविषयी या दुकान मालकांचे हित जपताना कमी दराने भाडे आकारण्यास अनुमती दिली. त्यामुळे या दीर्घकाळ प्रलंबित राहिलेला विषय अनेक वर्षानंतर सुटणार आहे.

20 कोटी अनुदानाची मागणी

साखळी नगरपालिका क्षेत्रातील प्रभाग क्र. 2 मध्ये असलेल्या 12 हजार चौ. मी. जागेत दोन व्यावसायिक प्रकल्प आणण्याविषयी चर्चा करून ठराव घेण्यात आला.

साखळी नगरपालिकेला सरकारतर्फे 20 कोटी रुपयांचे विशेष अनुदान देण्याची मागणी मुख्यमंत्री डॉ. प्रमोद सावंत यांच्याकडे करण्यात आली असून त्यातून बाजारात एक मल्टीपर्पज सभागृह प्रकल्प व इतर विकास कामे साकारण्यात येणार आहे, असे नगराध्यक्षा रश्मी देसाई यांनी सांगितले.

साखळीत ‘रिंग रोड’ हवा

साखळी बाजारात ये-जा करण्यासाठी असलेले रस्ते सुधारण्याचे काम सध्या नगरपालिकेने हाती घेतले आहे. त्यासाठी बसस्थानकाच्या डाव्या बाजूला सध्या असलेल्या तात्पुरत्या रस्त्याच्या ठिकाणी पक्का रस्ता साकारण्याचा इरादा आहे.

त्यासाठी सदर जागेचे मालक असलेल्या देसाई कुटुंबीयाशी चर्चा करण्यात येणार आहे. त्यांना इतरत्र जागा देऊन, या जागेचा उपयोग साखळी बाजारासाठी ‘रिंग रोड’ साकारण्यासाठी करण्यात येणार आहे, असे रश्मी देसाई यांनी सांगितले.