Khandepar Bridge: खांडेपार पुलावर अखेर कुर्टी-खांडेपार पंचायतीने सीसीटीव्ही कॅमेरे बसवले असल्याने येथे कचरा टाकण्याचा प्रकार बंद होईल. तसेच अपघात व दारूड्यांना चाप बसणार आहे, अशी अपेक्षा व्यक्त करण्यात येत आहे.

कुर्टी ते उसगाव महामार्गावर खांडेपार येथे जुना तसेच नवीन पूल आहे. या ठिकाणी पूर्वी जुना एकेरी पूल कार्यरत होता, त्यामुळे कायम वाहतूक कोंडी होत असे. नंतरच्या काळात चौपदरी रस्त्याचे काम हाती घेण्यात आल्यानंतर खांडेपार येथे नवीन पूल बांधण्यात आला, त्यानंतर या मार्गावरील वाहतूक कोंडीची समस्या पूर्णपणे मिटली गेली.

पण दोन्ही पुलावरून कचरा फेकण्याचे प्रकार काही बंद झाले नाहीत. याशिवाय अपघात करून पळून जाणारे वाहनचालक तसेच नवीन पुलाच्या जोडरस्त्यावर रात्रीच्यावेळी दारू पिऊन धिंगाणा घालणाऱ्या दारूड्यांमुळे हे पूल नेहमी चर्चेत असतात. या पुलावर सीसीटीव्ही कॅमेरा बसवावा यावर ग्रामसभेत अनेकदा चर्चा झाली होती.

दारूड्यांवर नजर...

खांडेपारच्या नवीन पुलाचा कुर्टी भागाकडील जोडरस्ता अद्याप पूर्ण झालेला नाही. हल्लीच या जोडरस्त्याचे काम हाती घेण्यात आले आहे. पण रात्रीच्यावेळी या पुलावर दारू पिऊन धिंगाणा घातला जातो. नशेत बाटल्या रस्त्यावर फोडण्याचे प्रकारही होत आहेत. या सीसीटीव्ही कॅमेऱ्यामुळे अशा प्रकाराला आळा बसेल, अशी अपेक्षा आहे.