Goa boating : गोव्यात सध्या पर्यटन हंगाम सुरु आहे. त्यानुसार राज्यात अनेक पर्यटक भेट देताहेत. याचा गैरफायदा घेत काही बेजबाबदार ऑपरेटर्स पर्यटक प्रवाशांना बेकायदेशीरपणे सामावून घेताहेत.

यातील बरेच ऑपरेटर हे योग्य परवाने व प्रशिक्षणाशिवाय काम करतात. त्यामुळेच कॅप्टन ऑफ पोटर्सने या बेकायदेशीरतेच्या विरोधात कारवाई करण्याचा निर्णय घेतला आणि अशा क्रियाकलापांना आळा घालण्यासाठी आज सिकेरी-कांदोळी येथे कॅप्टन ऑफ पोटर्सने तपासणी केली.

आवश्यक परवाने नसताना व ओव्हरलोड करून पर्यटकांची प्रवासी भाडी मारणाऱ्या पाच बोट शुक्रवारी सिकेरी-कांदोळी येथे कॅप्टन ऑफ पोटर्सने कारवाई करीत जप्त केल्या आहेत. मरीन निरीक्षकांकडून ही कारवाई केल्याचे सांगितले जात आहे.

उपलब्ध माहितीनुसार, या प्रवासी बोट चालकांकडे आवश्यक परवाने नव्हते. संबंधित चालक हे वैध परवान्याशिवाय बोट चालवण्यासोबत परवानगी दिलेल्या मर्यादेपेक्षा जास्त प्रवाशांची वाहतूक करीत होते.

याविषयी कॅप्टन ऑफ पोटर्सकडे तक्रारी येत असल्याने शुक्रवारी सिकेरी-कांदोळी येथे अचानक छापा टाकत वरील प्राधिकरणाने ही कारवाई केली. दरम्यान, अनेकदा अशा ओव्हरलोड प्रकारमुळेच समुद्रात बोट उलटण्याच्या काही घटना घडलेल्या आहेत.

मात्र जीवरक्षकांच्या सतर्कतेमुळे अनेकांचे प्राण व मोठया दुर्घटना टळल्या आहेत. त्यामुळे काही बेजबाबदार ऑपरेटर जे धोकादायक पद्धतीने पर्यटकांच्या जीवाशी खेळतात त्यांच्यावर अशीच कडक कारवाई व्हावी अशी मागणी होत आहे.

या जप्त केलेल्या बोटी एकाच मालकाच्या असून हा मालक परदेशात असतो, असे सूत्रांकडून समजते. संबंधित चालकांकडे प्रवासी बोट चालविण्याचा परवाना नव्हता. ज्या कामगारांना बोट चालविता येते किंवा स्विमिंग येते, अशी मंडळी या बोटी चालवायचे. त्यानुसार, कॅप्टन ऑफ पोटर्सने कारवाई करीत त्या जप्त केल्या.