काणकोण: गोव्याचे सांस्कृतिक प्रतीक मानले जाणारे ‘दिवज’ आज काणकोणात स्थानिक पातळीवर तयार होत नसल्याची खंत व्यक्त होत आहे. स्थानिक हस्तकारागिरांना प्रोत्साहन देण्यासाठी नेमलेल्या समित्यांनी आपले अहवाल सरकारकडे सादर केले असले तरी त्यांच्या शिफारशींची अंमलबजावणी होत नसल्याची नाराजी दोन-तीन वर्षे समितीवर काम केलेल्या सदस्यांनी व्यक्त केली.

काणकोण तालुक्यात काही वाड्यांना ‘कुंभार वाडा’ म्हणून ओळखले जात असले तरी सध्या दिवज निर्मिती करणारे कुंभार अभावानेच आढळतात. हीच अवस्था इतर पारंपरिक व्यवसायांचीही आहे.

महाशिवरात्रीनंतर तालुक्यात जत्रोत्सवांना प्रारंभ होतो. गुळ्ळे, लोलये, खोला ते खोतीगाव परिसरातील विविध देवालयांत दिवजोत्सवासाठी नवीन मातीच्या दिवजांची गरज भासते. दरवर्षी सुमारे एक हजार दिवजांची विक्री या उत्सवासाठी होत असून, यंदा एका दिवजाची किंमत तीनशे ते चारशे रुपये आहे.

मात्र, काणकोणात एकही कुंभार दिवज तयार करत नसल्याने हे दिवज कारवार जिल्ह्यातून विक्रीस आणले जातात, ही खंत स्थानिकांनी व्यक्त केली.

दरम्यान, गोव्याच्या सांस्कृतिक ओळखीचे प्रतीक असलेले दिवज स्थानिक पातळीवर तयार व्हावेत आणि पारंपरिक कुंभार व्यवसायाला नवसंजीवनी मिळावी, अशी मागणी नागरिकांकडून होत आहे.