Calangute Beach: गोव्यात सध्या विविध मंदिरांच्या जत्रोत्सवाचा काळ सुरू आहे. त्याच क्रमात बार्देश तालुक्यातील कळंगुट समुद्रकिनाऱ्यावरील देव बाबरेश्वर जत्रा अत्यंत उत्साहात आणि भक्तीभावात झाली. ही जत्रा केळींची जत्रा म्हणून प्रसिद्ध आहे.

या जत्रेत केळी या फळांना खूप महत्व आहे. जत्राकाळात मंदिराच्या छतावर केळी ठेवणं, हे या जत्रेचं वैशिष्ट्य आहे. या देवाला बोललेला नवस पूर्ण झाल्यावर भाविक देव बाबरेश्वराला केळीचा घड अर्पण करतात.

बागा-कळंगुट येथील बाबरेश्वर मंदिराच्या 59 व्या वार्षिक जत्रेत देव बाबरेश्वराची पुजा कळंगुट मतदारसंघाचे आमदार मायकल लोबो यांच्या हस्ते झाली. पुजेनंतर त्यांनी पत्रकारांशी संवाद साधला.

ते म्हणाले की, राज्यातील विविध धर्मियांचे सण जातीय सलोखा राखण्यास मदत करतात. गोव्यातच हे सांस्कृतिक चित्र दिसून येते. हे गोव्याचे वेगळेपण आहे.

केळी उत्सव या नावाने ओळखला जाणारी ही जत्रा सर्वधर्मियांना एकत्र आणते. सर्व लोकांना त्यांच्या धर्माचा विचार न करता एकत्र आणणारा हा सण आहे. अनेक परदेशी पर्यटकदेखील भगवान बाबरेश्‍वराच्या देवतेला नमन करण्यासाठी या मंदिराला भेट देतात.

भाविकांनी अर्पण केलेला केळीचा घड नंतर मंदिराच्या छताला बांधला जातो. काही दिवसांनी या घडांचा लिलाव केला जातो. हे मंदिर कळंगुट समुद्रकिनाऱ्यापासून अगदी जवळ आहे. कळंगुटला देशासह जगभरातील पर्यटक नियमित भेट देत असतात.

त्यामुळे या उत्सवाला जणू ग्लोबल भाविक येत असतात. त्यातून या जत्रेचा प्रसार जगभरात झाला आहे. जगभरात केळी महोत्सव म्हणून या जत्रेची ओळख आहे, अशी माहिती, मंदिराचे अध्यक्ष चंद्रकांत चोडणकर यांनी दिली.