वास्को : वास्को मार्केटजवळील जीर्ण इमारतीच्या स्लॅबचा काही भाग शुक्रवारी कोसळला. यात कोणतीही जीवितहानी झाली नाही. मुरगाव नगरपरिषदेचे (MMC) नगरसेवक विनोद किनळेकर यांनी कमकुवत आणि मोडकळीस आलेल्या इमारतींच्या सुरक्षेबाबत प्रश्न उपस्थित केले आहेत. तसेच नगरपरिषदेचे या विषयात लक्ष घालावे, अशी मागणी देखील केली आहे. मागील पंधरवड्यातील स्लॅब कोसळण्याची ही दुसरी घटना आहे. (Building's slab collapses in Vasco)

घटनेचे वर्णन करताना आदिल शेख यांनी प्रसारमाध्यमांना सांगितले की, ही घटना घडली तेव्हा मोठा आवाज झाला. मी माझ्या रेस्टॉरंटच्या बाहेर येऊन पाहिले तर स्लॅबचा एक भाग फूटपाथवर कोसळला होता. हा वर्दळीचा रस्ता असला तरी कोणीही जखमी झाले नाही. अधिकाऱ्यांनी रहिवाशांच्या सुरक्षेचा विचार करून जीर्ण इमारतींवर तातडीने उपाययोजना कराव्यात, अशी मागणी नगरसेवक विनोद किनळेकर आणि येथील नागरिकांनी केली आहे.