फोंडा: आवेडे-बोरी येथील श्री साईबाबा मंदिराचा ताबा घेण्यासाठी आलेल्या साईबाबा सेवामंडळ ट्रस्टच्या पदाधिकाऱ्यांना ग्रामस्थांनी अटकाव केल्यानंतर पोलिसांनी २१ महिला आंदोलकांना ताब्यात घेतले. त्यानंतर पोलिस बंदोबस्तात मंदिराचा ताबा ट्रस्टकडे सुपूर्द करण्यात आला.

यावेळी मामलेदार तसेच इतर सरकारी अधिकारी उपस्थित होते. बोरीतील या साईबाबा मंदिराचा वाद न्यायप्रविष्ट आहे. गेल्या जुलै महिन्यात बोरीतील ग्रामस्थांनी अचानक मंदिराचा ताबा घेतला होता. याविरोधात सेवामंडळ ट्रस्टने उच्च न्यायालयात धाव घेतली होती. ट्रस्टचे म्हणणे उचलून धरत न्यायालयाने मंदिराचा ताबा सेवामंडळ ट्रस्टला सोपवला आणि पोलिस बंदोबस्तात मंदिराचा ताबा घ्यावा, असे निर्देश दिले.

काय घडले?...

शुक्रवारी ट्रस्टचे अध्यक्ष दिनेश रायकर व इतर पदाधिकारी मंदिरात गेले असता, आधीच ठिय्या मारून बसलेल्या ग्रामस्थांनी त्यांना अटकाव केला. पोलिस उपअधीक्षक शिवराम वायंगणकर तसेच निरीक्षक मोहन गावडे यांनी ग्रामस्थांना सहकार्य करण्याचे आवाहन केले; मात्र त्यांनी नकार दिला. त्यामुळे पोलिसांनी मंदिरातील ग्रामस्थांना बाहेर काढले. यानंतर २१ महिला आंदोलकांना पोलिस बंदोबस्तात पोलिस स्थानकात नेण्यात आले.

ग्रामस्थांनी लावलेली कुलपे संबंधित अधिकाऱ्यांच्या साक्षीने तोडण्यात आली असून, सध्या मंदिराचा ताबा सेवामंडळ ट्रस्टकडे आहे. दुसरीकडे, ताब्यात घेण्यात आलेल्या महिलांविरुद्ध भारतीय न्यायसंहिता कलम १२६ अंतर्गत गुन्हा दाखल करण्यात आला असून, फोंडा पोलिस अधिक तपास करीत आहेत.

यापूर्वी दोघांना केली होती अटक

बोरीतील साईबाबा मंदिराचा वाद न्यायप्रविष्ट असून, सद्यस्थितीत मंदिराचा ताबा सेवामंडळ ट्रस्टकडे देण्यात आला आहे. गेल्या जुलै महिन्यात हा वाद विकोपाला गेल्यानंतर दोघाजणांना अटक आणि ३० जणांविरोधात गुन्हा दाखल करण्यात आला होता. अटक केलेल्या दोघांनाही जामिनावर सोडण्यात आले. आता सेवामंडळ ट्रस्टचे पदाधिकारी पोलिस संरक्षणात ताबा घेण्यासाठी आले असता, मंदिरात ठिय्या दिलेल्या ग्रामस्थांनी त्यांना अटकाव केला.