पणजी: धारगळमधील कार्यक्रमात मंत्री माविन गुदिन्‍हो यांनी मगोचे आमदार जीत आरोलकर यांच्‍याबाबत केलेले वक्तव्‍य बेजबाबदार आहे. मंत्री, आमदारांनी पक्षाच्‍या रिती आणि नितीनुसार मार्गक्रमण करावे. पक्षाची भूमिका आणि शिस्‍त शिकून घ्‍यावी, अशा कानपिचक्‍या भाजप प्रदेशाध्‍यक्ष दामू नाईक यांनी मंत्री गुदिन्‍होंना दिल्‍या.

काही दिवसांपूर्वी धारगळमध्‍ये झालेल्‍या एका कार्यक्रमात बोलताना मंत्री गुदिन्‍हो यांनी आमदार जीत आरोलकर यांनी आगामी विधानसभा निवडणुकीत भाजपमध्‍ये प्रवेश करून भाजपच्‍या उमेदवारीवर मांद्रेतून निवडणूक लढवावी, असे आवाहन केले होते.

शिवाय आरोलकर यांना मगो पक्षात त्रास होत असल्‍याचा दावाही त्‍यांनी केला होता. यावरून मगोचे अध्‍यक्ष दीपक ढवळीकर यांच्‍यासह केंद्रीय समितीच्‍या पदाधिकाऱ्यांनीही गुदिन्‍हो यांच्‍यावर तोफ डागली होती. मुख्‍यमंत्री डॉ. प्रमोद सावंत आणि दामू नाईक यांनी याबाबत मंत्री गुदिन्‍होंना समज द्यावी, अशी मागणीही त्‍यांनी केली होती.

योग्‍यवेळी योग्‍य कारवाई करू!

आमदार जीत आरोलकर यांच्‍याबाबत मंत्री गुदिन्‍होंनी केलेल्‍या वक्तव्‍यांप्रकरणी त्‍यांच्‍यावर पक्षाकडून कारवाई होणार का? असा प्रश्‍‍न पत्रकारांनी केला असता, मंत्री गुदिन्‍हो यांच्‍यावर योग्‍यवेळी योग्‍य ती कारवाई करण्‍यात येईल, असेही दामू नाईक यांनी नमूद केले.