Bird Bath Movement and Photo Exhibition Bandora

पक्षी छायाचित्रकार शैलेंद्र नाईक यांनी पक्ष्यांची घेतलेली छायाचित्रे पाहण्याचा आनंद आगळाच असतो. ते नुसते पक्ष्यांची छायाचित्रे टिपत नाहीत तर रंग आणि आकार यांची मनोरम रचनाच आपल्या छायाचित्रामधून ते कलात्मकपणे सादर करतात. एक उत्कृष्ट पक्षी छायाचित्रकार म्हणून त्यांचा लौकिक आता झाला आहे.

त्यांनी आपल्या कॅमेऱ्यात टिपलेल्या पक्ष्यांच्या छायाचित्रांचे प्रदर्शन 'बांदोडा जैवविविधता व्यवस्थापन समिती'ने आयोजित केलेल्या 'बर्ड बाथ मुव्हमेंट' च्या उद्घाटनाच्या निमित्ताने भरणार आहे. शैलेंद्र नाईक यांनी टिपलेली पक्ष्यांची उत्कृष्ट छायाचित्रे पाहण्यासाठी ही एक अपूर्व संधी आहे. 

या प्रदर्शनात शैलेन्द्र नाईक यांनी घेतलेली सुमारे १५० पक्ष्यांची छायाचित्रे पाहायला मिळतील. प्रत्येक छायाचित्रावर पक्ष्याच्या प्रजातीचे नाव असल्याने गोव्यातील वेगवेगळ्या प्रजातींच्या पक्ष्यांची ओळख देखील या छायाचित्रांमधून होईल.

बांदोडा जैवविविधता व्यवस्थापन समिती सुरू करू पाहणाऱ्या 'बर्ड बाथ' चळवळीचे उद्घाटन आज शनिवार, १ फेब्रुवारी रोजी सकाळी ९.३० वाजता, नागेशी- बांदोडा येथील रवळनाथ मंदिराच्या सभागृहात होणार आहे. त्यानिमित्ताने भरवले जाणारे शैलेंद्र नाईक यांच्या पक्षी छायाचित्रांचे प्रदर्शन १ आणि २ फेब्रुवारी असे दोन दिवस सकाळी ९.३० ते संध्याकाळी ६.३० पर्यंत सर्वांसाठी खुले असेल.