पणजी: हडफडे येथील बर्च बाय रोमिओ लेनचे मालक गौरव आणि सौरभ लुथरा अखेर कडक पोलिस बंदोबस्तात गोव्यात दाखल झाले आहेत. बुधवारी (१७ डिसेंबर) सकाळी अकरा वाजता गोवा पोलिसांच्या पथकासह लुथरा बंधू पेडण्यातील मोपा आंतरराष्ट्रीय विमानतळावर दाखल झाले. लुथरा बंधू मंगळवारी (१६ डिसेंबर) थायलंडमधून दिल्लीत दाखल झाले होते.

बँकॉक, थायलंड येथून विमानाने दिल्लीत दाखल झाल्यानंतर लुथरा बंधुंना गोवा पोलिसांनी अटक केली. यानंतर दोघांची वैद्यकीय तपासणी करण्यात आली. सर्व कायदेशीर सोपस्कर पूर्ण केल्यानंतर सकाळी दोघांना दिल्लीतून गोव्यात आणण्याची तयारी सुरु करण्यात आली.

दिल्ली विमानतळावरुन कडक पोलिस बंदोबस्तात निघालेले लुथरा बंधू सकाळी अकरा वाजता मोपा विमानतळावर दाखल. यावेळी विमानतळाबाहेर देखील कडक पोलिस बंदोबस्त तैनात करण्यात आला होता.

बर्च बाय रोमिओ लेन नाईटक्लबमध्ये लागलेल्या आगीत २५ जणांचा मृत्यू झाला होता. नाईटक्लबला लागलेल्या आगीनंतर क्लबचे मालक लुथरा बंधुंनी थायलंडला पलायन केले होते. यानंतर त्यांच्याविरोधात रेड कॉर्नर नोटीस जारी करुन थायलंडमध्ये अटक करण्यात आली होती.

मंगळवारी थायलंडमधून डिपोर्ट केल्यानंतर दोघेही दिल्लीत दाखल झाले. दिल्लीत अगोदरच दाखल झालेल्या गोवा पोलिसांनी लुथरा बंधुंना अटक करुन बुधवारी गोव्यात घेऊन आले आहेत.

पुढील कारवाईसाठी लुथरा बंधुंना हणजूण पोलिस स्थानकात हजर केले जाणार आहे. प्राथमिक चौकशीनंतर त्यांच्यावर पुढील कारवाई केली जाईल. दरम्यान, क्लबला लागलेल्या आगीत २५ जणांचा मृत्यू झाला होता.

याप्रकरणी लुथरा बंधुंच्या विरोधात सदोष मनुष्यवधाचा गुन्हा दाखल करण्यात आला आहे. लुथरा बंधुंनी दिल्लीच्या रोहिणी न्यायालयात अटकपूर्व जामिनासाठी अर्ज केला होता. हा अर्ज न्यायालयाने फेटाळून लावला होता.