डिचोली: मुख्यमंत्री डॉ. प्रमोद सावंत यांनी समज दिल्यानंतर कारापूर-सर्वण पंचायतीने विशेष मोहीम हाती घेऊन कचऱ्यावर नियंत्रण येण्यासाठी उपाययोजना केली आहे. दुसऱ्याबाजूने रोलिंगमिल परिसरात रस्त्याच्या बाजूने पुन्हा एकदा मोठ्या प्रमाणात कचरा साचला आहे.

ज्याठिकाणी कचरा साचला आहे, तो परिसर डिचोली पालिका क्षेत्रात येत आहे. असे वाटत असले, तरी हा परिसर कारापूर-सर्वण पंचायतीच्या कार्यक्षेत्रात येत आहे. खुद्द डिचोली पालिकेने तसा दावा केला आहे.

महिन्यापूर्वी मुख्यमंत्री डॉ. सावंत हे कारापूर पंचायतीत आले होते. त्यावेळी सर्वण येथील अंतर्गत रस्त्याच्या बाजूने साचलेला कचरा पाहून मुख्यमंत्री बरेच नाराज झाले होते. मुख्यमंत्री डॉ. सावंत यांनी कडक समज दिल्यानंतर दुसऱ्याच दिवशी कारापूर पंचायतीने व्यापक स्वच्छता मोहीम हातात घेताना सर्वणसह पंचायत क्षेत्रातील कचरा काढून परिसर चकाचक केला होता.

मात्र, रोलिंगमिल येथे रस्त्याच्या बाजूने कचरा साचला असून, परिसरात दुर्गंधी पसरली आहे. रोगराई पसरण्याची भीती आहे. स्थानिक पंचायतीचे त्याकडे दुर्लक्ष होत आहे. प्रत्येकवेळी पालिकेने हा कचरा का म्हणून काढावा, असा प्रश्न एका नगरसेवकाने उपस्थित केला आहे.

गोकुळवाडा भागा ‘जाळी’ पडली खाली

रस्त्याच्या बाजूने कचऱ्याचे प्रमाण नियंत्रणात यावे, यासाठी कारापूर-सर्वण पंचायतीने कचऱ्यासाठी हॉटस्पॉट बनलेल्या विविध भागात ‘जाळी’ मारली आहे. मात्र, काही ठिकाणी ‘जाळी’आड कचरा टाकण्याचे प्रकार सुरूच आहेत. गोकुळवाडा येथे डिचोलीच्या रस्त्याच्या बाजूने लावलेली ‘जाळी’ खाली पडली आहे. जाळी व्यवस्थित लावली नसल्याने ती खाली पडली आहे, की कचराफेकूंनी या जाळीची ही अवस्था केलीय, ते कळणे मुश्किल झाले आहे.