मेणकुरे: डिचोली तालुक्यातील तलाठी मारहाण प्रकरणाबद्दल आता आणखीन एक मोठा खुलासा झाला आहे. सरकारी सेवा बजावत असताना मेणकुरे-धुमासे पंचायतीचे तलाठी फटगो पालकर (वय ४७, हरवळे) यांना मारहाण करण्यात आली होती.

या प्रकरणालाच धरून डिचोली तालुक्यातील तलाठ्यांनी डिचोली पोलीस ठाण्यात धाव घेतली आणि आजच्या आज ( गुरुवार, दि. ७ नोव्हेंबर) रोजी आरोपींना अटक करण्याची मागणी केली आहे आणि असे न झाल्यास पोलीस स्थानकाबाहेर आंदोलनाचा इशारा देखील त्यांनी दिला आहे.

मेणकुरे-धुमासे पंचायतीचे तलाठी फटगो पालकर त्यांचे काम करत असताना त्यांना मेणकुरे येथील संजय विष्णू नाईक आणि अशोक विष्णू नाईक यांनी अचानक मारहाण केल्याचा आरोप पोलीस स्थानकात दाखल करण्यात आला होता.

मात्र दुसऱ्या बाजूने तलाठी फटगो पालकर आणि अमर अनंत नाईक यांनी एका महिलेसह मला आणि भावाला मारहाण केल्याची तक्रार अशोक विष्णू नाईक यांनी देखील दाखल केली होती. त्यांच्या म्हणनयनुसार तलाठी फटगो पालकर यांनी बेकायदेशीरपणे त्यांच्या जागेत प्रवेश केला होता.

तलाठी फटगो पालकर आणि अशोक विष्णू नाईक यांनी एकमेकांविरोधात तक्रार नोंदवण्याने या प्रकरणाचा गुंता वाढला होता आणि पोलीस याचा तपास करत होते मात्र आता डिचोली तालुक्यातील तलाठयांनी पोलीस स्थानकात आरोपींच्या अटकेची मागणी केल्याने या प्रकरणाला वेगळे वळण मिळाले आहे.