Menkurem Crime: 'मेणकुरे'त तलाठी मारहाणप्रकरणी वाद चिघळला! परस्परविरोधी तक्रार दाखल

Menkurem Talathi Assault Case

डिचोली: डिचोली तालुक्यातील मेणकुरे येथील तलाठी मारहाण प्रकरणाला आता वेगळेच वळण लागले असून, प्रकरणातील गुंता वाढला आहे. याप्रकरणी मारहाण झालेल्या तलाठ्याने मेणकुरे येथील दोन भावांविरोधात पोलिसांत तक्रार केली आहे. तर संबंधित तलाठ्याने अन्य एका व्यक्तीच्या मदतीने बेकायदेशीरपणे मालमत्तेत घुसून एका महिलेला मारहाण केल्याची परस्परविरोधी तक्रार पोलिसांत करण्यात आली आहे.

सरकारी सेवा बजावताना शिवीगाळ करून नंतर मला मारहाण करण्यात आली आहे, अशी तक्रार मेणकुरे-धुमासे पंचायतीचे तलाठी फटगो पालकर (४७, हरवळे) यांनी मेणकुरे येथील संजय विष्णू नाईक आणि अशोक विष्णू नाईक यांच्याविरोधात पोलिसांत केली आहे. एका तक्रारीला अनुसरून मेणकुरे येथील सर्व्हे नं-८९/१, ३९/१४ आणि ३९/१३ मालमत्तेची पाहणी करताना नाईक बंधूंनी अचानक मला मारहाण केली, असेही फटगो पालकर यांनी तक्रारीत म्हटले आहे.

दुसऱ्या बाजूने तलाठी आणि अमर अनंत नाईक यांनी एका नातेवाईक महिलेसह मला आणि भावाला मारहाण केली, अशी तक्रार अशोक विष्णू नाईक यांनी पोलिसांत केली आहे. तलाठी पालकर आणि अमर नाईक यांनी आमच्या मालमत्तेत बेकायदेशीरपणे शिरकाव केला, असा दावाही अशोक नाईक यांनी केला आहे. दरम्यान, आता पोलिस याप्रकरणी कोणत्या पद्धतीने तपास करतात ते पाहावे लागेल.

पोलिसांनी नोंदवली तक्रारदारांची जबानी

दोन्ही तक्रारींची तक्रारदारांची जबानी दखल घेत पोलिसांनी दोन्ही तक्रारदारांची जबानी नोंदवून घेतली आहे. डिचोलीचे पोलिस उपअधीक्षक जीवबा दळवी यांच्या मार्गदर्शनाखाली पोलिस याप्रकरणी तपास करीत आहेत.