डिचोली: शहरातील ‘सेतू संगम’ प्रकल्पस्थळी (सोमवारी) सकाळी एका साधारण ४६ वर्षीय परप्रांतीय इसमाचा मृतदेह आढळून आल्याने हा प्रकल्प पुन्हा एकदा चर्चेत आला आहे. यामुळे ‘सेतू संगम’च्या सुरक्षेत त्रुटी स्पष्ट होत आहेत. मृत व्यक्ती परप्रांतीय असून, तो भिकारी असल्याचे समजते.

सोमवारी सकाळी पालिकेचे स्वच्छता कामगार साफसफाई करण्यासाठी प्रकल्पस्थळी गेले असता, तेथील स्वामी विवेकानंद यांच्या पुतळ्याजवळ हा मृतदेह असल्याचे आढळून आले. त्याच्या नाकातोंडातून रक्त आले होते. अशी माहिती उपलब्ध झाली आहे. यासंबंधी डिचोली पोलिसांना कळवताच पोलिसांनी घटनास्थळी जाऊन मृतदेह ताब्यात घेतला.

मृतदेह डिचोलीच्या सामाजिक आरोग्य केंद्रात नेऊन नंतर शवचिकित्सा करण्यासाठी मृतदेह बांबोळीच्या ''गोमेकॉ''त पाठवला. या इसमाचा मृत्यू नेमका कसा झाला. ते स्पष्ट होऊ शकले नाही. मात्र अति मद्यप्राशन केल्यामुळे तो झोपेत बाकट्यावरून खाली पडून त्यातच त्याचा मृत्यू झाला असावा, असा प्राथमिक अंदाज आहे.

शवचिकित्सा अहवालानंतरच मृत्यूचे नेमके कारण स्पष्ट होणार आहे. वरिष्ठांच्या मार्गदर्शनाखाली डिचोली पोलिस याप्रकरणी पुढील तपास करीत आहेत. दरम्यान, अडीज वर्षांपूर्वी एका युवकाचा खून झाल्यानंतर या प्रकल्पस्थळी आता एक संशयास्पद मृतदेह आढळून आल्याने ''सेतू संगम'' वरील सुरक्षेचा प्रश्न पुन्हा एकदा ऐरणीवर आला आहे.

सुरवातीपासूनच ''श्रेय''वादात अडकलेल्या या प्रकल्पाची देखभाल करण्याकडे पूर्ण दुर्लक्ष होत असल्याने या प्रकल्पाच्या सौंदर्याला सध्या समस्यांचे ग्रहण लागल्याचे आढळून येत आहे. आठ वर्षांपूर्वी सार्वजनिक बांधकाम आणि जलस्रोत खात्याच्या सहकार्यातून येथील दोन्ही पुलांच्या मधोमधच्या जागेत हा प्रकल्प उभारण्यात आलेला आहे.

मात्र हळूहळू या प्रकल्पाच्या देखभालीकडे दुर्लक्ष झाले आहे. शहराच्या वैभवात भर घालणारा ''सेतू संगम'' हा प्रकल्प म्हणजे भिकारी आणि मद्यपींचे आश्रयस्थान बनले आहे. बऱ्याचदा रात्रीच्यावेळी या प्रकल्पात भिकारी आश्रय घेत असतात. काहीजण मद्यप्राशन करून या प्रकल्पात झोपलेले आढळून येतात.

उपाययोजना करा

ऑगस्ट २०२३ मध्ये या प्रकल्पावर रमेश सिद्धागोळी या युवकाचा निर्दयीपणे खून करण्याची घटना घडली होती. या खून प्रकरणामुळे शहरात खळबळ माजली होती. ज्या युवकाचा खून झाला आहे, तो युवक आणि मारेकरी रात्रीच्यावेळी या प्रकल्पस्थळी आसरा घेत होते,अशी माहिती त्यावेळी उघड झाली होती.

या घटनेनंतर प्रकल्पावरील भिकारी आणि मद्यपींच्या वावरावर नियंत्रण येईल, अशी अपेक्षा होती. मात्र त्याकडे दुर्लक्ष झाल्याने भिकारी आणि मद्यपींसाठी हा प्रकल्प आश्रयस्थान बनल्याचे दिसून येत आहे. भविष्यात अनर्थ घडण्यापूर्वीच या प्रकल्पस्थळी सुरक्षेसाठी उपाययोजना करावी, अशी मागणी होत आहे.