डिचोली: ''स्वच्छ आणि सुंदर शहर'' अशी ओळख असलेल्या डिचोलीत भर बाजाराजवळ पुन्हा एकदा शहाळ्यांच्या करवंट्या टाकण्याचे प्रकार वाढले आहेत. सध्या बाजाराजवळ शहाळ्यांच्या करवंट्यांचा मोठ्या प्रमाणात खच पडल्याचे आढळून येत असून, हा कचरा म्हणजे डेंग्यू आदी जीवघेण्या रोगराईला आमंत्रणाचा धोका असल्याची भीती व्यक्त करण्यात येत आहे.

गेल्यावर्षी मे महिन्यात याचठिकाणी मोठ्या प्रमाणात शहाळ्यांच्या करवंट्यांचा खच पडला होता. त्यावेळी दै. ''गोमन्तक'' मधून या समस्येला वाचा फोडल्यानंतर पालिकेला खडबडून जाग आली होती.

पालिकेने त्वरित पावले उचलताना शहाळ्यांच्या करवंट्यांची विल्हेवाट लावून परिसर चकाचक केला होता. त्यानंतर शहाळ्यांच्या करवंट्या टाकण्याचे प्रकार बंद झाले होते. मात्र आता पुन्हा हे प्रकार घडू लागल्याने बाजारातील व्यापाऱ्यांसह ग्राहकांमध्ये चिंता व्यक्त होत आहे. दीड वर्षांपूर्वी शहरासह बाजार परिसरात डेंग्यूने थैमान घातले होते. मात्र आता शहाळ्यांच्या करवंट्यांमुळे पुन्हा एकदा रोगराईची भीती व्यक्त होत आहे.

पालिका इमारतीच्या मागच्या बाजूने आणि मासळी मार्केटला टेकून बाजारातील मोकळ्या जागेत सध्या मोठ्या प्रमाणात शहाळ्यांच्या करवंट्यांचा खच पडला आहे. सध्या या परिसरात गेल्यास मोठ्या प्रमाणात करवंट्यांच्या कचराच दिसून येत आहे. शहाळी विक्रेते या करवंट्या भर बाजाराजवळ टाकतात.

या करवंट्यांमुळे डासांची पैदासही वाढली आहे. या करवंट्या वेळीच काढल्या नाहीत, तर बाजारात भयानक समस्या निर्माण होताना रोगराईला आमंत्रण ठरण्याची भीती व्यक्त करण्यात येत आहे. संध्याकाळच्यावेळी तर डासांचा उपद्रव वाढला आहे. येथील परिस्थिती हाताबाहेर जाण्याअगोदर परिसर स्वच्छ आणि कचरामुक्त करावा, अशी मागणी बाजारातील व्यापाऱ्यांनी केली आहे.