डिचोली: एका १७ वर्षीय अल्पवयीन मुलीला फूस लावून पळवून नेऊन तिच्यावर लैंगिक अत्याचार केल्याच्या प्रकरणी डिचोली पोलिसांनी महाराष्ट्रातील कणकवली येथील एका १९ वर्षीय युवकाला अटक केली आहे. पोलिसांनी या प्रकरणाचा तपास वेगानं करत अवघ्या २४ तासांत पीडित मुलीची सुखरूप सुटका केली आहे.

२४ सप्टेंबर रोजी रात्री पीडित मुलगी घरी परतली नाही. तात्काळ डिचोली पोलीस ठाण्यात तिच्या अपहरणाची तक्रार नोंदवण्यात आली. या गंभीर प्रकरणावर तात्काळ कारवाई करण्यासाठी पोलीस प्रशासनाने वेळ न घालवता दोन पथके तयार केली आणि त्यांना महाराष्ट्र व कर्नाटकमधील विशिष्ट ठिकाणी रवाना केले.

पोलीस निरीक्षक श्रीधर कामत आणि विराज धावस्कर यांच्या मार्गदर्शनाखाली अन्य अधिकाऱ्यांनी तांत्रिक साधने व गुप्त माहितीच्या आधारे तपासाला गती दिली. या कार्यवाहीत पोलिसांनी ठळक आणि जलद कारवाई करत मुलीचा ठावठिकाणा शोधला.

अखेर पीडित मुलीला महाराष्ट्रातील कणकवली येथे सुरक्षित अवस्थेत सापडले. त्याच ठिकाणाहून पोलिसांनी आरोपी युवकास ताब्यात घेतले. आरोपीविरुद्ध अपहरणासह लैंगिक अत्याचाराचे गुन्हे दाखल करण्यात आले आहेत.