मासेमारी बंदीमुळे सध्या समुद्रातील मासळीचा तुटवडा निर्माण झाला असून, मासळी महाग झाली आहे. सध्या गावठी मासळीचे दिवस असले, तरी ही मासळी सामान्य मत्स्यप्रेमी खवय्यांच्या आवाक्याबाहेर गेली आहे. डिचोलीच्या मासळी मार्केटमध्ये गावठी मासळीसह समुद्रातील मासे अजूनही उपलब्ध होत असले, तरी मासळीचे प्रमाण कमी झाले आहे.

दुसऱ्या बाजूने गावठीसह समुद्रातील मासळी महाग झाल्याने सामान्य लोकांनी मासळी मार्केटकडे पाठ केली आहे. मासळी मार्केटमध्ये पूर्वीसारखी नियमित गर्दी होत नाही. सध्या लहान सुंगटे, तारले 200 रुपये वाटा, तर कोळंबी, शिणाने, कोळंबी, काळुंदरे, सुरमई आदी मासळी 400 ते 600 रुपये किलो या दराने तर गावठी मासे 500 रुपये वाटा याप्रमाणे विकण्यात येत आहेत.

गावठी मासळीला तेजी

सध्या गावठी मासळीचे दिवस आहेत. डिचोलीत मोठ्या प्रमाणात नसली, तरी मये, चोडण आदी ठराविक भागातून गावठी मासळी उपलब्ध होत आहे. सुंगटे, शेवटे, काळंदुरे आदी ठरावीक प्रकारची गावठी मासळी बाजारात विक्रीस उपलब्ध होत आहे. कमीतकमी ५०० रुपये वाटा, याप्रमाणे गावठी मासळी विकण्यात येते. गावठी मासळीचे दर ऐकताच मत्स्यप्रेमी खवय्यांच्या कपाळाला आट्या पडतात. सामान्य मत्स्यप्रेमी खवय्यांवर तर नको ती गावठी मासळी, अशी म्हणण्याची पाळी येते.

मासळीबाबत प्रश्नचिन्ह : खोल समुद्रात मासेमारीसाठी बंदी आहे. तरीसुद्धा डिचोलीच्या मासळी बाजारात अजूनही बांगडे, कोळंबी, सुरमई, तारले आदी समुद्रातील मासळीची मोठ्या प्रमाणात नसली, तरी नियमित आवक होत आहे. मासेमारीसाठी बंदी असताना ही मासळी कोठून उपलब्ध होते, त्याविषयी प्रश्नचिन्ह उपस्थित होत आहे. तर मार्केटात उपलब्ध होणारी मासळी ताजी असते. असा दावा मासेविक्रेत्यांकडून करण्यात येत आहे.

विविध प्रकारची मासळी उपलब्ध होत आहे. सामान्य लोकांना तर मासळी आवाक्याबाहेर झाली आहे. मासळी मार्केटात पाय ठेवावा की नाही, त्याबाबत शंभरवेळा विचार करण्याची पाळी येते.

मदन माशेलकर, ग्राहक.