पणजी : गेल्या 9-10 दिवसांपासून मुसळधार पडणाऱ्या पावसामुळे अंजुणे आणि पंचवाडी धरणे वगळता इतर धरणांमध्ये समाधानकारक पाणी साठा जमा झाला आहे. त्यामुळे सध्यातरी पिण्याच्या पाण्याची समस्या दूर झाली आहे.
यंदा मान्सून लांबल्याने राज्यातील सर्वच धरणांतील पाणीसाठा कमालीचा कमी झाला होता. पंचवाडी आटले होते, तर अंजुणेने तळ गाठला होता. त्यामुळे या धरणांच्या खालील जलप्रकल्प संकटात आले होते. जलस्रोत खात्याने पिण्याच्या पाण्याकरीता कच्च्या पाण्यासाठी पर्याय व्यवस्थेसाठी अभ्यास सुरू केला होता. अस्नोडा- पडोसे या जुन्या सार्वजनिक बांधकाम खात्याच्या नळ योजनेतून पडोसे प्रकल्पात पाणी आणण्यासाठी चाचणीची तयारी केली होती.
दरम्यान, २३ जून पासून पावसाने जोर धरल्यामुळे धरणांमधील पाणीसाठ्यात वाढ झालेली आहे. साळावली धरणाची पाणी साठवण्याची क्षमता २३,४३६ हेक्टोमीटर इतकी आहे. या धरणात आतापर्यंत ६,०५६ हेक्टोमीटर पाणी साठले आहे. हे धरण २६ टक्के भरलेले आहे. आमठाणेची पाणी साठवण्याची क्षमता ५८५ हेक्टोमीटर आहे.
तेथे सध्या २५२ हेक्टोमीटर पाणी असून, हे धरण ४३ टक्के भरलेले आहे. चापोलीची क्षमता १,१२२ हेक्टोमीटर असून, या धरणात ४६९ हेक्टोमीटर पाण्याचा साठा झालेला आहे. हे धरण ४२ टक्के भरलेले आहे. गावणे धरणाची पाणी साठवण्याची क्षमता १७७ हेक्टोमीटर असून,
या धरणात सध्या ७१.४५ हेक्टोमीटर इतक्या पाण्याचा साठा आहे. हे धरण ४० टक्के भरलेले आहे.सध्या धरण परिसरामध्ये मोठ्या प्रमाणात पाऊस पडत आहे,त्यामुळे शेतकऱ्यांमध्ये समाधानाचे वातावरण आहे. पेरणीच्या कामांनाही सध्या वेग आला आहे.
अंजुणे, पंचवाडीला अजून पावसाची आवश्यकता
धरण क्षमता
‘अंजुणे’ ४,४८३ हेक्टोमीटर
पंचवाडी ४३६ हेक्टोमीटर
शिल्लक पाणीसाठा
२०७ हेक्टोमीटर ४.३१ टक्के
५३ हेक्टोमीटर १२.८ टक्के
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
