Goa Congress : गुणवंत विद्यार्थ्यांवरील अन्याय दूर करण्यासाठी न्यायालयाचा दरवाजा ठोठावणार

Goa Congress : कारे कॉलेज ऑफ लॉच्या प्राचार्याने आपल्या मुलाच्या फायद्यासाठी परीक्षा प्रक्रियेत फेरफार केल्याचा आरोप करत काँग्रेसच्या राज्‍यातील नॅशनल स्टुडंट्‌स युनियन ऑफ इंडिया (एनएसयूआय) शाखेने एलएलबी प्रवेश परीक्षेच्‍या चौकशी करण्याची मागणी केली आहे. चौकशीस सुरूवात न केल्यास कुलपती तथा राज्यपालांची भेट घेऊ, असे एनएसयूआयचे अध्यक्ष नौशाद चौधरी यांनी सांगितले. तेथेही दखल घेतली गेली नाहीतर न्यायालयाचा दरवाजा ठोठावला जाईल असा इशारा देऊन त्‍या प्राचार्यास ताबडतोब निलंबित करा, अशी मागणी केली.

काँग्रेस भवनात सोमवारी झालेल्या पत्रकार परिषदेस चौधरी यांच्यासमवेत एनएसयूआयचे सदस्य उपस्थित होते. दै. ‘गोमन्तक’ने हा अनागोंदी प्रकार उघडकीस आणला होता. चौधरी म्हणाले, उच्च शिक्षण संचालनालय आणि गोवा विद्यापीठाने या प्रकरणात हस्तक्षेप करून संपूर्ण प्रक्रियेची चौकशी करावी. गुणवंत विद्यार्थ्यांवर अन्याय होत आहे.

चांगले गुण मिळूनही त्यांना डावलले जाण्याची भीती आहे. कारे महाविद्यालयाच्या प्राचार्यांनी आपल्या मुलाला परीक्षेत उत्तरे देता यावीत म्हणून हा सर्व खटाटोप केला आहे. एलएलबीची प्रवेश परीक्षा कारे कॉलेज ऑफ लॉने घेतली, ती नियमानुसार नाही, असे चौधरी म्‍हणाले.

एनएसयूआयच्‍या काही प्रमुख मागण्या

या प्रकरणाची तात्काळ चौकशी करून दोषी प्राचार्याला निलंबित करा.

मूल्यमापन प्रक्रियेत बदल करून पात्र विद्यार्थ्यांना सामावून घेऊन त्‍यांना न्याय द्या.

पुढील शैक्षणिक वर्षापासून अनियमितता थांबवण्यासाठी संलग्न महाविद्यालयांद्वारे घेण्यात येणारी बीएएलएलबीची प्रवेश परीक्षा गोवा विद्यापीठाने घ्यावी.