पिसुर्ले: पिसुर्ले येथील शिमगोत्सवाची सांगता धुळवडीच्या गुलालाने करून 23 मार्चपासून नवदुर्गा मंदिरातील कळस बाहेर काढून कौलोत्सवाला सुरवात झाली. परंतु गावातील महाजन मंडळींमध्ये दोन गट पडले असल्याने एकच गट या उत्सवात सहभागी झाला.या गावातील शिमगोत्सवाला मोठी परंपरा असून पाच दिवस शिमगोत्सव साजरा करून सहाव्या दिवशी नाटक सादर केले जाते. सातव्या दिवशी देवाला गुलाल चढवून धुळवड साजरी केली जाते.

त्यानंतर दुपारी नवदुर्गा मंदिरातील कळस वाजत-गाजत बाहेर काढून काही प्रमुख महाजनांद्वारे तो कळस काही वाड्यांवरील घरांमध्ये फिरवला जातो. ही परंपरा गेल्या कित्येक वर्षांपासून सुरू असून यामध्ये धाटवाडा, धोणकलवाडा, बानवाडा, शांतीनगर, पिसुर्ले देऊळवाडा व गावकरवाडा यांचा समावेश आहे.

हा कळस बाहेर काढताना येथील महादेव मंदिरात त्याची पुरोहितांच्या हस्ते विधिवत पूजा केली जाते. त्यानंतर ढोल- ताशांच्या गजरात कळस घरोघरी नेऊन तेथे खणानारळाने ओटी भरली जाते. त्याचप्रमाणे पूजाही केली जाते. यावेळी ग्रामस्थांकडून नवस बोलले जातात आणि पूर्णही केले जातात.