Ganesh Chaturthi 2023: श्री गणरायाच्या आशीर्वादाने राज्‍याचा चांगला विकास होवो. तसेच पुन्‍हा एकदा नरेंद्र मोदी हेच देशाचे पंतप्रधान व्हावेत. त्‍यासाठी त्यांना चांगले आरोग्य लाभो, असे साकडे आरोग्यमंत्री विश्‍‍वजीत राणे यांनी आपल्‍या विठ्ठलापूर-साखळी येथील निवासस्‍थानी श्री गणरायाला घातले. वडील माजी मुख्‍यमंत्री प्रतापसिंह राणे, आई विजयादेवी राणे, पत्नी आमदार डॉ. दिव्‍या राणे, बहीण विश्‍‍वधारा व अन्‍य कुटुंबीयांसमवेत त्‍यांनी हा सण साजरा केला.

गणेश चतुर्थी हा आनंदाचा व उत्साहाचा सण. दरवर्षी आम्ही गणेशाच्या आगमनाची आतुरतेने वाट पाहत असतो. या आनंदाच्या उत्‍सवात संपूर्ण कुटुंब एकत्र येते. यामुळे एकमेकांबद्दल असलेले प्रेम, स्नेहाची भावना वाढीस लागते, असे आरोग्यमंत्री विश्‍‍वजीत राणे यांनी सांगितले. राज्‍यातील जनतेला सुखी ठेव, अशी प्रार्थनाही त्‍यांनी केली.

आमदार डॉ. दिव्या राणे म्हणाल्‍या की, बाप्पा ही बुद्धीची देवता आहे. सत्तरीतील जनतेला सुख-समृद्धी मिळो तसेच सत्तरीच्या विकासासाठी वेळोवेळी आम्हाला आशीर्वाद देत राहो. कोणतेही शुभ काम करताना आम्ही गणेशाची उपासना करतो. हा उत्सव आनंद देणारा आहे.

पालखीतून आणली जाते गणेशमूर्ती

विठ्ठलापूर-साखळी येथील श्री विठ्ठल-रखुमाई मंदिराच्या बाजूलाच राणे यांचा राजवाडा आहे. पूर्वपरंपरेनुसार गणेश चतुर्थीसाठी राणे घराण्याची गणेशमूर्ती ही विठ्ठलापूर येथील गावकऱ्यांकडून पालखीतून आणली जाते. मूर्ती पालखीतून विधीवतपणे घरात आणल्यानंतर ब्राह्मणाकरवी शास्त्रोक्त पद्धतीने पूजन केले जाते. माजी मुख्यमंत्री प्रतापसिंह राणे यांनी श्री गणेशाची पूजा केली.