Goa Tourism: पर्यटन सफारींसाठी खास सुरू केलेली ‘हॉप ऑन’ची पर्यटकांना भुरळ

Goa Tourism: पर्यटन सफारींसाठी खास सुरू केलेली हॉप ऑन हॉप ऑफ (होहो) बस सेवा देशी तसेच विदेश पर्यटकांच्या पसंतीस पडू लागली आहे. स्वस्त असल्याने पर्यटक या सेवेकडे आकर्षित होत आहेत.

गेल्या काही महिन्यांपासून या सेवेला मोठा प्रतिसाद मिळत आहे. होहो बस सेवेचे वरिष्ठ प्रतिनिधी बिमल सिंघा यांनी सांगितले की, काही महिन्यांपासून होहो बस सेवेत सुधार झाला असून, देशी तसेच, विदेशातून गोवा फिरायला आलेले पर्यटक आमच्या बस सेवेला प्राधान्य देत आहेत. सध्या तीन होहो बसेस सेवा देत आहेत.

या बसेस रोज तीन ते चार फेऱ्या उत्तर गोव्यातील प्रेक्षणीय स्थळांवर मारतात. यात पर्यटकांना उघड्या बसमधून वरून गोव्याचे सौंदर्य पाहायला मिळते. परत या बसेसमध्ये टेलिव्हिजन आणि संगीतही असते. प्रवासा दरम्यान, गोव्याविषयी माहिती देणारे अनेक व्हिडीओ या बसमध्ये चालवले जातात, असे सिंघा यांनी सांगितले.