पणजी: सरकारने ‘ईव्ही’ खरेदीवर सबसिडी लागू केली आहे, त्यामुळे ऑगस्ट २०२२ पासून आजपर्यंत ईव्ही अनुदानासाठीचे किती अर्ज मंजूर झाले आणि किती रक्कम वितरित झाली, किती अर्ज प्रलंबित आहेत याची माहिती जनतेसमोर आणावी.

सरकारच्या दिवाळखोरीमुळे ही सबसिडी ईव्ही मालकांना वेळेवर देण्यास सरकारला अपयश आले आहे, अशी टीका काँग्रेस मीडिया सेलचे अध्यक्ष अमरनाथ पणजीकर यांनी केली आहे.

ईव्ही वाहनासाठीच्या प्रक्रियेच्या सर्व औपचारिकता पूर्ण केलेले बहुतेक महिलांचा समावेश असलेले अनेक अर्ज गेल्या अनेक महिन्यांपासून अनुदानाची रक्कम मिळण्याच्या प्रतीक्षेत आहेत.

सरकारी अधिकाऱ्यांनी निधी उपलब्ध नसल्यामुळे रक्कम वितरण प्रलंबित असल्याचे अर्जदारांना सांगितल्याचा दावा करून अनुदान योजनेच्या आडून अर्जदारांकडून फक्त शुल्क वसूल केले, असा आरोप पणजीकर यांनी केला.

...तर आंदोलन छेडू!

नवीन आणि नवीकरणीय ऊर्जा खात्यामार्फत हे अनुदान देण्यात येणार आहे. मात्र या खात्याचे मंत्री ही रक्कम वाहन चालकांना वेळेत देण्यास अपयशी ठरले आहेत. सरकारी तिजोरीतच हे अनुदान देण्यासाठी रक्कम नसल्याने ती देण्यास विलंब होत आहे.

गोव्यात पर्यायी वीजनिर्मिती वाढवण्यात तसेच ई वाहनांना चालना देण्यात मंत्री सपशेल अपयशी ठरलेत. गोव्यात ईव्ही चार्जिंग स्टेशन पुरेशी नसल्याने ई -वाहनधारकांना चार्जिंगची समस्या भेडसावत आहे. सरकार फक्त घोषणा करत आहे, परंतु प्रत्यक्षात काहीच होत नाही.

सर्व प्रलंबित अर्जांचे अनुदान वितरण सरकारने तातडीने करावे, अशी काँग्रेसची मागणी आहे, मात्र ती पूर्ण करण्यास सरकार अपयशी ठरल्यास काँग्रेस आंदोलन करेल, असा इशारा पणजीकर यांनी दिला.