GMC Road Traffic Issue

पणजी: बांबोळी येथील गोमेकॉ इस्पितळाबाहेर असलेल्या बेकायदा मोबाईल फास्टफूडच्या वाहनांमुळे वाहतुकीची कोंडी होत आहे. तेथील पदपथावर व रस्त्यावर टेबल-खुर्च्या घालून अतिक्रमण केले जात आहे.

सांताक्रुझ पंचायत तसेच बांबोळी पोलिस चौकीचा आशीर्वाद या फास्टफूडधारकांना असल्याने वाहन चालकांना त्याचा त्रास सहन करावा लागत असल्याची चर्चा आहे.

रस्त्याच्या दोन्ही बाजूने वाहन पार्किंग तसेच हे अतिक्रमण यामुळे अनेकदा रुग्णवाहिकेला अडथळा निर्माण होण्याचे प्रकार घडले आहेत. ही फास्टफूड वाहनांविरोधात उत्तर गोवा जिल्हाधिकाऱ्यांनी कायदेशीर कारवाईची मागणी वाहन चालकांकडून होत आहे.

या इस्पितळाच्या मुख्य प्रवेशद्वाराबाहेर होत असलेल्या वाहतूक कोंडीमुळे पूर्वीच्या भाजी व फळे विक्रेत्यांना तेथून हटवून त्यांना कायदेशीर गाळे देण्यात आले आहेत. ही कारवाई दोन वर्षापूर्वी झाली होती.

मात्र कालांतराने पुन्हा नव्याने भाजी व फळे विक्रेत्यांनी तेथे ठाण मांडले आहे. सांताक्रुझ तसेच कुडका पंचायतीकडून होत असलेल्या दुर्लक्षामुळेच या विक्रेत्यांचे फावले आहे. पंचायतीच्या काही सदस्यांचे सगेसोयरे तेथे व्यापार करत असल्याने कोणीच कारवाई इच्छित नाही.

सर्व प्रकारच संशयास्पद

काही दिवसांपूर्वी या वाहतुकीसंदर्भात पोलिसांना तक्रारी आल्या मात्र बांबोळी पोलिस चौकीच्या पोलिसांचेच या फास्टफूड धारकांशी साटेलोटे असल्याने कारवाईकडे दुर्लक्ष केले जाते. त्यांच्याविरुद्ध कारवाई करण्याऐवजी फक्त समज दिली जाते. या मोबाईल फास्टफूड वाहनांना तेथे वाहने उभी करून व्यापार करण्यास कोणतेचे परवाने नाहीत तरी कारवाई केली जात नाही. पोलिस नियंत्रण कक्षाचे वाहनही वेळेवर पोहचत नाही, त्यामुळे हा सर्व प्रकारच संशयास्पद आहे.

विक्रेत्यांवर कारवाई का नाही?

या परिसरात अनेक शहाळे विक्रेते आहेत, मात्र या शहाळ्यांचा कचरा एका पिशवीत साठवून तो दूर ठिकाणी टाकण्याऐवजी तेथील अंतर्गत रस्‍त्याच्या बाजूनेच टाकण्यात आला आहे. पंचायतीला हे माहीत असूनही त्याकडे डोळेझाक करत आहे. हे विक्रेते सांताक्रुझ व कुडका या भागातीलच असल्याने त्यांचे पंचायत सदस्यांशी लागेबांधे आहेत. सांताक्रुझ पंचायत कचरा रस्त्याच्या बाजूने फेकणाऱ्यांना ५ हजारांचा दंड ठोठावते तर या विक्रेत्यांवर का कारवाई करत नाही? असा प्रश्‍न नागरिक करत आहेत.