हरमल: बामणभाटी येथील शेतजमिनी प्रशासनाच्या दुर्लक्षामुळे गेली चार वर्षे पडीक आहे. त्यामुळे शेतकऱ्यांत संताप व्यक्त करीत आहेत.

सुमारे १० हजार चौरस मिटर या जागेत किमान १ ५ते २० शेतकरी भातशेती, मिरची व अन्य उत्पादने घेत होते. परंतु येथील रस्त्याची उंची वाढविल्याने व या शेतातील पाणी निचरा होण्यास वाट नसल्याने पाणी तुंबून राहते. त्यामुळे गेली चार वर्षे ही शेती पडीक आहे.

वास्तवात पाण्याचा निचरा एक ओहोळातून होत होता, मात्र कोणा एका धनाढ्य व्यक्तीने त्या ओहोळात काँक्रिट घालून रस्ता तयार केल्याने पाण्याचा निचरा होत नाही. डोंगरावरून येणारे पाणी शेत जमिनीत साचून राहते. त्यामुळे येथे शेती करता येत नाही, असे शेतकरी ठाकूर यांनी सांगितले.

अधिकाऱ्यांकडून पाहणी, पण...

कृषी, बांधकाम व जलस्रोत खात्याचे अधिकारी, उपजिल्हाधिकारी व गट विकास अधिकाऱ्यांनी या परिसराची पाहणी केली, मात्र आतापर्यंत कोणतीही उपाययोजना केलेली नाही. उपाययोजना झाल्यास १० हजार चौरस मीटर जमीन लागवडीखाली येईल,असे शेतकरी दत्ताराम ठाकूर यांनी सांगितले.